امریکا اور قطر کا ایران کے منجمد اربوں ڈالر جاری کرنے پر غور، 6 ارب ڈالر کی ابتدائی رقم تک رسائی کا امکان
واشنگٹن (قدرت روزنامہ)امریکا اور قطر ایران کو منجمد مالی اثاثوں تک محدود رسائی دینے کے منصوبے پر غور کر رہے ہیں۔ میڈیا رپورٹس کے مطابق ابتدائی مرحلے میں قطر میں موجود 6 ارب ڈالر ایران کو خوراک، ادویات اور دیگر انسانی ضروریات کی خریداری کے لیے فراہم کیے جا سکتے ہیں۔
امریکا اور قطر ایران کے منجمد اربوں ڈالر کے اثاثوں کو مرحلہ وار جاری کرنے کے منصوبے پر غور کر رہے ہیں۔ امریکی اخبار وال اسٹریٹ جرنل کی رپورٹ کے مطابق اس منصوبے کے تحت ابتدائی طور پر قطر میں موجود 6 ارب ڈالر ایرانی حکام کو انسانی بنیادوں پر اخراجات کے لیے دستیاب کیے جا سکتے ہیں۔
رپورٹ میں بتایا گیا ہے کہ یہ رقم ایران کے مرکزی بینک کی ملکیت ہے اور زیادہ تر تیل کی فروخت سے حاصل ہونے والی آمدنی پر مشتمل ہے، جو امریکی پابندیوں کے باعث منجمد رہی ہے۔ مجوزہ منصوبے کے مطابق ایران ان فنڈز کو خوراک، ادویات اور دیگر ضروری اشیا کی خریداری کے لیے استعمال کر سکے گا۔
ذرائع کے مطابق یہ اقدام حال ہی میں امریکا اور ایران کے درمیان طے پانے والے معاہدے کا حصہ ہے، جس کا مقصد کئی ماہ سے جاری کشیدگی کا خاتمہ اور اعتماد سازی کو فروغ دینا ہے۔ امریکا اس طریقہ کار کے ذریعے ایران کی خریداریوں پر نظر رکھنے اور منجمد اثاثوں تک اس کی رسائی کے عمل کو کنٹرول میں رکھنے کا خواہاں ہے۔
ماہرین کا کہنا ہے کہ محدود مالی اثاثوں کی بحالی ایران کی معیشت کے لیے اہم سہارا ثابت ہو سکتی ہے اور اسے کرنسی کے استحکام اور اندرونی معاشی دباؤ کم کرنے میں مدد ملے گی۔ رپورٹ کے مطابق دنیا بھر میں منجمد تقریباً 100 ارب ڈالر کے ایرانی اثاثوں کی آئندہ مرحلہ وار رہائی کے لیے بھی یہی ماڈل اختیار کیا جا سکتا ہے، تاہم اس کے لیے ایران کو جوہری مذاکرات اور معاہدے کی شرائط پر عمل درآمد جاری رکھنا ہوگا۔
