پاکستان کرکٹ ٹیم کے ہیڈ کوچ مائیک ہیسن کو انگلینڈ کی کوچنگ کے لیے شارٹ لسٹ کرلیا گیا

لاہور(قدرت روزنامہ)پاکستان کرکٹ ٹیم کے موجودہ ہیڈ کوچ مائیک ہیسن کو انگلینڈ ٹیسٹ ٹیم کے نئے ہیڈ کوچ کے لیے شارٹ لسٹ کیے گئے امیدواروں میں شامل کرلیا گیا ہے۔

برطانوی میڈیا کے مطابق انگلینڈ اینڈ ویلز کرکٹ بورڈ نے نیوزی لینڈ کے برینڈن میک کولم کی جگہ نئے ٹیسٹ کوچ کی تلاش شروع کردی ہے، جس کے لیے مائیک ہیسن سمیت کئی نامور کوچز کو زیرِ غور لایا جا رہا ہے۔

برینڈن میک کولم نے مئی 2022 میں انگلینڈ ٹیسٹ ٹیم کی کوچنگ سنبھالی تھی، تاہم نیوزی لینڈ کے خلاف ہوم سیریز میں 2-1 سے شکست کے بعد انگلینڈ اینڈ ویلز کرکٹ بورڈ نے انہیں عہدے سے ہٹا دیا۔ اسی سیریز کے بعد انگلینڈ کے ٹیسٹ کپتان بین اسٹوکس نے بھی بین الاقوامی کرکٹ سے ریٹائرمنٹ کا اعلان کر دیا تھا۔

رپورٹس کے مطابق انگلینڈ کرکٹ بورڈ اگلی ذمہ داری سے قبل نئے ٹیسٹ کپتان اور ہیڈ کوچ کی تلاش میں مصروف ہے۔ انگلینڈ کی اگلی ٹیسٹ سیریز پاکستان کے خلاف ہوگی، جو 19 اگست سے 13 ستمبر تک کھیلی جائے گی۔

انگلینڈ اینڈ ویلز کرکٹ بورڈ کے ڈائریکٹر آف کرکٹ روب کی اور قومی سلیکٹر مارکس نارتھ نئے کوچ کے انتخاب کے عمل کی نگرانی کر رہے ہیں۔

بورڈ کے چیف ایگزیکٹو رچرڈ گولڈ نے کہا ہے کہ اس عہدے کے لیے دنیا بھر میں موزوں امیدواروں کی تعداد محدود ہے اور شارٹ لسٹ میں تقریباً 6 سے 10 نام شامل ہیں۔

برطانوی میڈیا کے مطابق انگلینڈ کرکٹ بورڈ نے کوچ کے عہدے کے لیے امیدواروں کی فہرست مزید مختصر کرتے ہوئے 9 نام شارٹ لسٹ کیے ہیں، جن میں جسٹن لینگر، اینڈی فلاور، رچرڈ ڈاؤسن، جوناتھن ٹراٹ، کمار سنگاکارا، اسٹیفن فلیمنگ، ٹام موڈی، ایڈی بیرل اور مائیک ہیسن شامل ہیں۔

رپورٹ کے مطابق اینڈی فلاور اور جسٹن لینگر کو انگلینڈ ٹیسٹ ٹیم کے کوچ کے لیے مضبوط امیدوار قرار دیا جا رہا ہے، تاہم مائیک ہیسن کا نام بھی خاص توجہ کا مرکز ہے۔

مائیک ہیسن گزشتہ سال سے پاکستان کی وائٹ بال کرکٹ ٹیم کے ہیڈ کوچ کی ذمہ داریاں انجام دے رہے ہیں اور ان کا شمار دنیا کے تجربہ کار کرکٹ کوچز میں ہوتا ہے۔