حکمران عوام کو ایسے لوٹ رہے ہیں جیسے منگولوں نے بغداد کو لوٹا تھا، فواد چوہدری

اسلام آباد(قدرت روزنامہ)سابق وفاقی وزیر اور سیاستدان فواد چوہدری نے امریکہ اور ایران کے تنازعہ کے باعث ملک میں بڑھتی ہوئی مہنگائی اور پٹرولیم مصنوعات کی قیمتوں میں ریکارڈ اضافے پر حکومت کو شدید تنقید کا نشانہ بناتے ہوئے ہمسایہ ممالک سے موازنہ پیش کیا ہے۔ تفصیلات کے مطابق سوشل میڈیا پلیٹ فارم ایکس پر جاری کردہ اپنے ایک بیان میں فواد چوہدری نے اعداد و شمار کا موازنہ کرتے ہوئے حکومت کی معاشی پالیسیوں کی قلعی کھول دی، انہوں نے خطے کی صورتحال پر لکھا کہ امریکہ اور ایران کے درمیان فوجی تصادم کے آغاز سے لے کر اب تک پاکستان کی حکومت نے پیٹرول کی قیمت میں 114 روپے فی لیٹر کا بھاری اضافہ کیا، اس کے برعکس اسی دوران بھارت نے پٹرول کی قیمتوں میں صرف 7 روپے فی لیٹر اور بنگلہ دیش نے صرف 24 ٹکا فی لیٹر اضافہ کیا ہے۔

امریکہ اور ایران تنازع کے آغاز سے لے کر اب تک پاکستان نے پیٹرول کی قیمتوں میں 114 روپے فی لیٹر اضافہ کیا ہے۔ اسی دوران بھارت نے قیمتوں میں صرف 7 روپے فی لیٹر اور بنگلہ دیش نے صرف 24 ٹکا فی لیٹر اضافہ کیا۔ دوسری طرف صرف تین دنوں میں چالیس ارب کی گاڑیاں خرید رہے ہیں مریم نواز گیارہ…

— Ch Fawad Hussain (@fawadchaudhry) September 9, 2026

فواد چوہدری نے عوامی معاشی مشکلات کے باوجود حکمرانوں کے شاہانہ اخراجات اور شاہ خرچیوں کو بھی آڑے ہاتھوں لیا، انہوں نے الزام عائد کیا کہ ایک طرف عوام معاشی بحران کا شکار ہیں اور دوسری طرف صرف تین دنوں کے اندر 40 ارب روپے کی نئی گاڑیاں خریدی جا رہی ہیں، مریم نواز 11 ارب روپے کا جہاز لے کر لندن میں چھٹیوں پر موجود ہیں۔
سابق وفاقی وزیر نے اشیائے ضروریہ کی قیمتوں پر تشویش ظاہر کرتے ہوئے کہا کہ آٹا، پیاز اور دیگر روزمرہ کی تمام اشیاء کی قیمتوں کو پر لگ چکے ہیں، اس صورتحال میں مؤثر اپوزیشن کی عدم موجودگی کی وجہ سے موجودہ حکمران عوام کو اس بے دردی سے لوٹ رہے ہیں جیسے تاریخ میں منگولوں نے بغداد کو لوٹا تھا۔