ملک میں کتنی سیاسی جماعتیں رجسٹرڈ ہوگئیں؟ الیکشن کمیشن نے تفصیلات جاری کردیں

اسلام آباد(قدرت ورزنامہ)الیکشن کمیشن آف پاکستان نے ملک بھر میں رجسٹرڈ 161 سیاسی جماعتوں کی تازہ فہرست جاری کردی جس میں سیاسی جماعتوں کے نام، رجسٹریشن کی تفصیلات اور پارٹی سربراہان کے نام شامل ہیں۔

الیکشن کمیشن کی جانب سے جاری دستاویز کے مطابق فہرست سرکاری ریکارڈ کے مطابق مرتب کی گئی ہے اور اس میں ملک میں رجسٹرڈ سیاسی جماعتوں کی موجودہ تفصیلات شامل کی گئی ہیں۔
دستاویز کے مطابق سابق وزیراعظم شاہد خاقان عباسی کی جماعت عوام پاکستان پارٹی اس فہرست میں رجسٹرڈ سیاسی جماعت کے طور پر موجود نہیں۔
پاکستان تحریک انصاف الیکشن کمیشن کی فہرست میں 79ویں نمبر پر درج ہے تاہم اس کے سامنے پارٹی سربراہ کا نام درج نہیں کیا گیا۔
الیکشن کمیشن کے ریکارڈ کے مطابق متحدہ قومی موومنٹ پاکستان کے سربراہ ڈاکٹر خالد مقبول صدیقی ہیں، جبکہ ایاز لطیف پلیجو کی قومی عوامی تحریک فہرست میں 89ویں نمبر پر موجود ہے۔
تحریک لبیک پاکستان بھی الیکشن کمیشن کی فہرست میں شامل ہے اور 97ویں نمبر پر رجسٹرڈ درج ہے، تاہم اس جماعت کے سامنے بھی سربراہ کا نام درج نہیں کیا گیا۔
فہرست میں پیرپگارا سید صبغت اللہ شاہ راشدی کے نام سے دو سیاسی جماعتیں بھی رجسٹرڈ دکھائی گئی ہیں۔ الیکشن کمیشن کے ریکارڈ کے مطابق مسلم لیگ فنکشنل اور گرینڈ ڈیموکریٹک الائنس دونوں پیرپگارا کے نام سے درج ہیں۔
الیکشن کمیشن کی جاری کردہ 161 سیاسی جماعتوں کی فہرست میں ملک بھر کی مختلف سیاسی جماعتوں کی رجسٹریشن اور ان کے سربراہان سے متعلق دستیاب سرکاری ریکارڈ شامل کیا گیا ہے۔
تازہ فہرست کے اجرا کے بعد سیاسی جماعتوں کی رجسٹریشن، پارٹی سربراہان کے اندراج اور الیکشن کمیشن کے سرکاری ریکارڈ سے متعلق صورتحال مزید واضح ہوگئی ہے۔ فہرست سیاسی جماعتوں سے متعلق الیکشن کمیشن کے موجودہ سرکاری ریکارڈ کی عکاسی کرتی ہے۔