بے نظیر انکم سپورٹ پروگرام کی اگلی قسط 6 بینکوں کے ذریعے مستحق خواتین کے ڈیجیٹل والٹس میں منتقل کرنے کا فیصلہ
ملک بھر میں 93 لاکھ سے زائد ڈیجیٹل والٹ اکاؤنٹس فعال، مزید بینک بھی ادائیگیوں کے نظام میں شامل کیے جائیں گے، تھرپارکر میں خشک سالی سے متاثرہ خاندانوں کے لیے امداد کا اعلان
اسلام آباد(قدرت روزنامہ)بے نظیر انکم سپورٹ پروگرام (بی آئی ایس پی) کی آئندہ قسط ملک بھر کی مستحق خواتین کے ڈیجیٹل والٹ اکاؤنٹس میں 6 بینکوں کے ذریعے براہ راست منتقل کی جائے گی، جبکہ مستحق خواتین کو رقوم کی ادائیگی میں مزید سہولت فراہم کرنے کے لیے جلد اضافی بینکوں کو بھی اس نظام میں شامل کیا جائے گا۔
بی آئی ایس پی کی چیئرپرسن سینیٹر روبینہ خالد نے تھرپارکر کے دورے کے دوران اس اقدام کا اعلان کرتے ہوئے مستحق خاندانوں کو مالی معاونت کی فراہمی اور نئے خاندانوں کی رجسٹریشن کے حوالے سے مختلف اقدامات کی تفصیلات بھی بتائیں۔
صدر مملکت آصف علی زرداری کی خصوصی ہدایت پر روبینہ خالد نے تھرپارکر کا دورہ کیا، جہاں انہوں نے ڈپٹی کمشنر آفس مٹھی میں ضلعی انتظامیہ کے افسران اور منتخب نمائندوں کے اجلاس سے خطاب کیا۔
خشک سالی سے متاثرہ خاندانوں کے لیے مالی امداد
بی آئی ایس پی کی چیئرپرسن نے کہا کہ تھرپارکر کو خشک سالی سے متاثرہ ضلع قرار دیے جانے کے بعد مستحق خاندانوں کو پروگرام کے تحت مالی معاونت فراہم کی جائے گی۔
انہوں نے بتایا کہ امدادی پروگرام میں مزید خاندانوں کو شامل کرنے کا فیصلہ بھی کیا گیا ہے تاکہ خشک سالی سے متاثرہ افراد کو مالی مشکلات سے نمٹنے میں مدد مل سکے۔
روبینہ خالد نے زور دیا کہ غریب اور مستحق افراد کے لیے شروع کیے جانے والے امدادی پروگراموں کو سیاسی مقاصد کے لیے استعمال نہیں کیا جانا چاہیے۔
غربت کا اسکور 50 تک بڑھانے پر غور
چیئرپرسن بی آئی ایس پی کے مطابق اس وقت غربت کا اسکور 32 تک رکھنے والے خاندان پروگرام کے تحت مالی امداد کے اہل ہیں، تاہم تھرپارکر میں خشک سالی کی صورتحال کے پیش نظر حکومت غربت کا اسکور 45 سے 50 تک رکھنے والے خاندانوں کو بھی مالی معاونت کے دائرے میں لانے پر غور کر رہی ہے۔
مجوزہ اقدام کا مقصد ایسے خاندانوں کی مدد کرنا ہے جو خشک سالی کے باعث شدید مشکلات کا شکار ہیں، تاہم موجودہ معیار کے تحت مالی امداد حاصل کرنے کے اہل نہیں ہیں۔
خواتین کی رجسٹریشن کے لیے موبائل وینز بھیجنے کا اعلان
روبینہ خالد نے کہا کہ عملے کی کمی دور کرنے کے لیے اضافی ملازمین کو ڈیپوٹیشن پر تعینات کیا جائے گا، جبکہ دور دراز علاقوں میں رہنے والی مستحق خواتین کی سہولت کے لیے موبائل رجسٹریشن وینز بھی بھیجی جائیں گی۔
انہوں نے کہا کہ موبائل وینز کے ذریعے ان خواتین کو رجسٹریشن کی سہولت فراہم کی جائے گی جنہیں رجسٹریشن مراکز تک پہنچنے میں مشکلات کا سامنا کرنا پڑتا ہے۔
93 لاکھ سے زائد ڈیجیٹل والٹ اکاؤنٹس فعال
چیئرپرسن بی آئی ایس پی نے انکشاف کیا کہ ملک بھر میں 93 لاکھ سے زائد ڈیجیٹل والٹ اکاؤنٹس فعال کیے جاچکے ہیں، جبکہ پروگرام کی آئندہ قسط ان اکاؤنٹس میں 6 بینکوں کے ذریعے براہ راست منتقل کی جائے گی۔
انہوں نے کہا کہ ادائیگیوں کے نظام کو مزید آسان اور مؤثر بنانے کے لیے جلد مزید بینکوں کو بھی اس نظام میں شامل کیا جائے گا۔
روبینہ خالد کے مطابق اس وقت ملک بھر میں تقریباً ایک کروڑ 2 لاکھ خاندان بے نظیر انکم سپورٹ پروگرام کے تحت مالی معاونت حاصل کر رہے ہیں، جس سے پاکستان بھر میں تقریباً 5 کروڑ افراد مستفید ہو رہے ہیں۔
انہوں نے کہا کہ ڈیجیٹل والٹ نظام متعارف کرانے کا بنیادی مقصد مالی امداد کی ادائیگیوں میں شفافیت یقینی بنانا، مستحق خواتین کو براہ راست رقوم کی منتقلی اور ادائیگی کے عمل کو سہل بنانا ہے۔
