کراچی میں بارش، سندھ اسمبلی کی چھت بھی ٹپکنے لگی

کراچی (قدرت روزنامہ)کراچی میں ہونے والی بارش سے نشیبی علاقوں میں کچے گھروں کی ہی نہیں بلکہ ریڈ زون میں واقع سندھ اسمبلی کی چھت بھی ٹپکنے لگی۔اے آر وائی نیوز کے مطابق کراچی میں ہونے والی بارش سے نشیبی علاقوں میں کچے گھروں کی ہی نہیں بلکہ ریڈ زون میں واقع سندھ اسمبلی کی چھت بھی ٹپکنے لگی جس پر پی ٹی آئی کے اراکین اسمبلی نے احتجاج بھی کیا ہے۔
کراچی میں وقفے وقفے سے کہیں ہلکی اور کہیں تیز بارش جاری ہے بارش کے باعث جہاں شہر کے نشیبی اور کچے علاقوں میں صورتحال ابتر ہوئی ہے وہیں ریڈ زون میں بھی پانی جمع ہوگیا ہے جب کہ بارش کے دوران اسی علاقے میں واقع سندھ اسمبلی کی چھت بھی ٹپکنے لگی جس کی پی ٹی آئی کے ایم پی اے شہزاد قریشی نے ویڈیو بنالی۔بارش کے بعد ریڈ زون اور سندھ اسمبلی کی صورتحال پر پی ٹی آئی کے اراکین اسمبلی نے شدید احتجاج کیا ہے۔
پی ٹی آئی ایم پی ایز شہزاد قریشی، خرم شیر زمان، شاہنواز جدون، سعید آفریدی نے احتجاج کرتے ہوئے کہا کہ ہے 10 منٹ کی بارش سے شہر قائد کا ریڈ زون ڈوب کیا ہے جس میں وزیراعلیٰ ہاؤس اور سندھ اسمبلی کی عمارت بھی موجود ہے جب ریڈ زون کا یہ حال ہے تو باقی شہر کا کیا حال ہوگا۔ان کا کہنا تھا کہ معمولی بارش نے سندھ حکومت کی قلعی کھول دی ہے، سڑکوں پر موجود پانی پی پی کی صوبائی حکومت اور سیاسی ایڈمنسٹریٹر کے منہ پر طمانچہ ہے جب کہ سندھ اسمبلی کی چھت ٹپکنے سے ثابت ہوتا ہے کہ اسمبلی کی تعیمرات میں بھی کرپشن کی گئی ہے۔
دوسری جانب شہر قائد میں دوپہر تک سخت حبس اور گرمی کے بعد وقفے وقفے سے کہیں ہلکی اور کہیں تیز بارش جاری ہے، اطلاعات کے مطابق نارتھ کراچی، ناظم آباد، نارتھ ناظم آباد، سرجانی ٹاؤن، صدر، اولڈ سٹی ایریا، نیول کالونی، کورنگی، اختر کالونی، قیوم آباد، ڈیفنس سمیت شہر بھر میں بارش کا سلسلہ جاری ہے۔
بارش کے باعث شارع فیصل، ایم اے جناح روڈ، یونیورسٹی روڈ، آئی آئی چندریگر روڈ سمیت مختلف کچی آبادیوں اور نشیبی علاقوں میں برساتی پانی بھی جمع، منگھوپیر روڈ پر گڑھا پڑ گیا ہے، جس کے باعث ٹریفک کی روانی متاثر ہوئی ہے جب کہ کئی علاقوں میں ٹریفک جام کی بھی اطلاعات ہیں۔
بارش کے ساتھ ہی اولڈ سٹی ایریا، موسیٰ کالونی، شہر کے کئی علاقوں میں بجلی بند ہونے کی شکایات بھی موصول ہوئی ہیں۔محکمہ موسمیات کے مطابق منگل کی شام تک کراچی میں سب سے زیادہ بارش مسرور بیس میں 13 ملی میٹر ریکارڈ کی گئی ہے اس کے علاوہ پی اے ایف فیصل بیس میں 11، کیماڑی میں 9 اورنگی ٹاؤن میں 5 اور ناظم آباد میں 5.6 ملی میٹر بارش ریکارڈ کی گئی ہے۔