سجل علی کو پرانے گانے کیوں پسند ہیں؟ اداکارہ نے بتادیا

اسلام آباد (قدرت روزنامہ)پاکستان کی معروف اداکارہ سجل علی کا کہنا ہے کہ انہیں پرانے گانے پسند ہیں کیونکہ وہ انکی والدہ کو پسند تھے۔حال ہی میں معروف اداکارہ نے اپنے ایک انٹرویو کے دوران کہا کہ وہ پرانی موسیقی کے ذریعے والدہ کو اپنے آس پاس محسوس کرتی ہیں۔

انہوں نے کہا کہ ان کی والدہ پرانے گانے شوق سے سنا کرتی تھیں اسی وجہ سے ان میں بھی پرانے گانوں کی دلچسپی پیدا ہوئی۔

سجل علی نے کہا کہ میں والدہ کے ساتھ پرانے گانے گاتی تھی اور اکثر ان سے کہتی تھی کہ آپ ٹھیک سے سُر نہیں لگا رہیں یہ ایسے نہیں ایسے ہے۔

انہوں نے کہا کہ میری والدہ کو پرانا گانا ’ مجھے تم نظر سے گرا تو رہے ہو‘ بہت پسند تھا اور وہ اکثر گایا کرتی تھیں تو جب ان کا انتقال ہوا تو میرا پرانے گانوں سے لگاؤ اور بھی بڑھ گیا۔

اداکارہ کا کہنا تھا کہ انکی زندگی کا سب سے بڑا نقصان والدہ سے بچھڑنا ہے۔ سجل اور ان کی بہن صبور دونوں ہی اپنی والدہ کے بے حد قریب تھیں اور ان کے انتقال نے دونوں کی زندگی کو مکمل بدل کر رکھ دیا۔