آفتاب سلطان نے بطور چیئرمین نیب مستعفی ہونے کی وجہ بتا دی

اسلام آباد (قدرت روزنامہ)قومی احتساب بیورو (نیب) کی چیئرمین شپ سے مستعفی ہونے والے آفتاب سلطان نے استعفیٰ دینے کی وجہ بتا دی۔آفتاب سلطان نے ’جیو نیوز‘ سے گفتگو کرتے ہوئے بتایا ہے کہ میں نے کچھ دن پہلے ہی استعفیٰ دے دیا تھا۔انہوں نے کہا کہ مجھے کچھ چیزوں کے بارے میں کہا گیا جو مجھے قبول نہیں تھیں، میں شرائط کےساتھ کام جاری نہیں رکھ سکتا۔
قومی احتساب بیورو کے سابق چیئرمین نے مزید بتایا کہ میرا استعفیٰ قبول کر لیا گیا ہے، ہمارا اختتام اچھے موڑ پر ہوا ہے۔آفتاب سلطان کا یہ بھی کہنا ہے کہ وزیرِ اعظم شہباز شریف نے میرے لیے نیک خواہشات کا اظہار کیا ہے، میری بھی ان کے لیے نیک خواہشات ہیں۔واضح رہے کہ قومی احتساب بیورو (نیب) کے چیئرمین آفتاب سلطان نے استعفیٰ دے دیا ہے۔
ذرائع نے بتایا ہے کہ وزیرِ اعظم شہباز شریف سے چیئرمین نیب آفتاب سلطان نے ملاقات کی اور اپنا استعفیٰ پیش کیا۔ذرائع نے مزید بتایا ہے کہ وزیرِ اعظم شہبازِ شریف نے چیئرمین نیب آفتاب سلطان کا استعفیٰ منظور کر لیا ہے۔