ملکی بحری سرحدوں کی حفاظت، بحریہ سربراہ کا آپریشنل تیاریوں پر اطمینان کا اظہار
اسلام آباد (قدرت روزنامہ)نیول چیف ایڈمرل نوید اشرف نے ملکی بحری سرحدوں کے دفاع کے لیے پاک بحریہ کی آپریشنل تیاریوں پر اطمینان کا اظہار کیا ہے۔
پاک فوج کے شعبہ تعلقات عامہ (آئی ایس پی آر) کے مطابق پاک بحریہ کی کمانڈ اینڈ اسٹاف کانفرنس کا نیول ہیڈکوارٹرز اسلام آباد میں انعقاد ہوا، جس کی صدارت سربراہ پاک بحریہ ایڈمرل نوید اشرف نے کی۔
کانفرنس میں شمالی بحیرہ عرب اور خلیج عدن میں بحری صورتحال کا جائزہ، قومی سمندری تجارتی گزرگاہوں کےتحفظ اور سلامتی کے اقدامات پر غور کیا گیا۔
کانفرنس میں میری ٹائم سیکیورٹی چیلنجز سے نمنٹے کے لیے جدید ہتھیاروں اور ٹیکنالوجی کے حصول کو سراہا گیا۔
نیول چیف نے ساحلی علاقوں میں بارشوں سے پیدا ہونے والی سیلابی صورتحال سے بچنے کے لیے فوری اقدامات اٹھانے کی ہدایت کی۔
نیول چیف کو پاک بحریہ کے جاری اورمستقبل کے منصوبوں پر بریفنگ بھی دی گئی۔