افغان ارب پتی تاجر دبئی میں دنیا کا دوسرا بلند ترین ٹاور قائم کرے گا

دبئی (قدرت روزنامہ)دنیا کے دوسرے بلند ترین ٹاور برج عزیزی کی دبئی سمیت دنیا کے 8 شہروں میں تقریب رونمائی منعقد کی گئی۔
میڈیا رپورٹس کے مطابق برج خلیفہ کے بعد دنیا کا دوسرا بلند ترین ٹاور 725 میٹر بلند اور دبئی کی جدید اسکائی لائن میں ایک شاندار اضافہ ثابت ہوگا۔
عزیزی ٹاور کا باضابطہ افتتاح گزشتہ دنوں دبئی کے کوکا کولا ایرینا میں ایک شاندار تقریب کے دوران کیا گیا جس میں 15 ہزار سے زائد معزز مہمانوں، سرکاری حکام، سرمایہ کاروں، کاروباری شخصیات، سفارت کاروں اور میڈیا نمائندگان نے شرکت کی۔
اس شاندار موقع کو مزید یادگار بنانے کے لیے عالمی شہرت یافتہ گلوکارہ جینیفر لوپیز نے خصوصی پرفارمنس دی۔
العربیہ نیوزکے مطابق ٹاور شیخ زید روڈ پر ایک مرکزی مقام پر تعمیر کیا جارہا ہے اور 2028 تک مکمل ہونے کی توقع ہے۔
131 سے زائد منزلوں پر مشتمل یہ ٹاور ایک پرتعیش شاپنگ مال، لگژری ہوٹل، جدید سہولیات سے آراستہ رہائشی اپارٹمنٹس اور تفریحی مقامات پر مشتمل ہوگا۔
اس میں 130ویں منزل پر دنیا کی بلند ترین آبزرویشن ڈیک، 111ویں منزل پر سب سے اونچی ہوٹل لابی، 122ویں منزل پر بلند ترین ریسٹوران اور 118ویں منزل پر سب سے اونچا ہوٹل روم شامل ہوگا۔
پروجیکٹ میں ایک، دو اور تین بیڈ روم کے رہائشی اپارٹمنٹس بھی ہوں گے جبکہ ہر 20ویں منزل پر ریسٹوران، کیفے اور سپر مارکیٹ سمیت جدید ترین خصوصی سہولیات شامل ہوں گی۔
ذرائع ابلاغ کے مطابق عزیزی برج کے مالک افغان ارب پتی تاجر میرویس عزیزی ہوتک ہیں۔ جو کئی بزنس اداروں کے سربراہ ہیں۔
عزیزی ہوتک نے حال ہی میں افغانستان میں دس ارب ڈالر کے تجارتی اور خیراتی منصوبوں کا آغاز کیا ہے۔ عزیزی فاؤنڈیشن کی جانب سے کابل میں ایک بڑے طبی شہر کا قیام بھی عمل میں لایا جا رہا ہے، جو مختلف اہم شعبوں پر مشتمل ہوگا۔
اس میڈیکل سٹی میں کینسر کے علاج کے لیے 400 بستروں پر مشتمل جدید اسپتال، 200 بستروں کا جدید زچگی اسپتال، 10,000 بچوں کے لیے یتیم خانہ، جس میں رہائش، اسکول اور صحت کے مراکز شامل ہوں گے، میڈیکل یونیورسٹی، نرسنگ اسکول، طلبہ کے لیے ہاسٹل، ڈاکٹروں اور اساتذہ کے لیے رہائشی کمپلیکس بھی بنے گا۔
کابل کے اس منصوبے کا تخمینہ 500 ملین ڈالر ہے اور یہ کابل کے آٹھویں علاقے میں 180 ایکڑ اراضی پر بنایا جائے گا۔