نیب نے پرویزخٹک کے خلاف انکوائری روک دی

اسلام آباد (قدرت روزنامہ)نیب نے مالم جبہ اسکینڈل میں پرویزخٹک کے خلاف انکوائری روک دی۔مالم جبہ اسکینڈل میں نامزد سابق وزیراعلیٰ اور موجودہ وزیردفاع پرویز خٹک کے خلاف احتساب عدالت نے بھی انکوائری روکنے کی نیب درخواست منظور کرلی ہے۔
نیب پشاور نے وفاقی وزیر پرویزخٹک اور دیگر کے خلاف انکوائری شروع کی تھی۔
ذرائع کے مطابق نیب نے احتساب عدالت سے پرویز خٹک اور دیگر کے خلاف انکوائری روکنے کے لئے درخواست دی تھی، جس کوعدالت نے منظور کرلیا ہے۔واضح رہےکہ نیب انکوائری پرویز خٹک، سابق ایڈیشنل چیف سیکریٹری اعظم خان، ایم ڈی سیاحت کے خلاف کی جا رہی تھی۔
ذرائع کے مطابق نیب مالم جبہ میں 275 ایکڑ فارسٹ لینڈ لیز پر دینے اور 30 سال توسیع کے خلاف انکوائری کررہا تھا۔نیب نے وزیراعلیٰ خیبر پختونخوا محمودخان سے بھی مالم جبہ میں 275 ایکڑ سرکاری زمین لیز پر دینے کے متعلق تفتیش کی تھی۔