نادرا کا بڑا کریک ڈاؤن: بلوچستان میں افغان مہاجرین کے 100 سے زائد شناختی کارڈز بلاک، سہولت کاروں پر سخت کارروائی کا اعلان

کوئٹہ ( ڈیلی قدرت ) نادرا ریجنل ہیڈ آفس کوئٹہ نے صوبے بھر میں افغان مہاجرین اور ان کے سہولت کاروں کے خلاف کارروائیوں کا دائرہ مزید وسیع کر دیا ہے۔ حالیہ کارروائیوں کے دوران نادرا بلوچستان نے مزید 100 افراد کے شناختی کارڈز بلاک کر دیے ہیں، جن میں کوئٹہ کے 6 خاندان اور قلعہ عبداللہ کے 5 خاندان شامل ہیں۔ حکام کے مطابق، یہ افراد یا خاندان مبینہ طور پر افغان شہریوں کو پاکستانی شہری ظاہر کرنے میں ملوث پائے گئے ہیں۔
نادرا حکام نے بتایا کہ جعلی اندراجات کے درجنوں کیسز کی نشاندہی کے بعد کارروائیاں تیز کی گئی ہیں اور کوئٹہ کے جن علاقوں سے سب سے زیادہ مشکوک شناختی کارڈز بلاک کیے گئے ہیں، ان میں ہزارہ ٹاؤن، مری آباد، ریسانی روڈ، پشتون آباد، بروڑی روڈ اور سریاب روڈ شامل ہیں۔ کوئٹہ کے علاوہ پشین، چمن، قلعہ عبداللہ، گلستان اور ژوب سمیت دیگر اضلاع میں بھی افغان مہاجرین کے شناختی کارڈز کی جانچ سخت کر دی گئی ہے۔ نادرا کی سپیشل ٹیمیں ان کیسز کی ازسرِ نو چھان بین کر رہی ہیں جن میں غیر ملکیوں کو پاکستانی فیملیز کا حصہ ظاہر کیا گیا تھا۔
⚖️ جعلی پاسپورٹس اور سخت قانونی کارروائی
نادرا حکام کے مطابق، صرف شناختی کارڈز ہی نہیں بلکہ مشکوک اور جعلی پاسپورٹس کے خلاف بھی کارروائی شروع کر دی گئی ہے اور اس سلسلے میں تفصیلی فہرست ایف آئی اے کے حوالے کر دی گئی ہے۔ ایف آئی اے نے نادرا کے ڈیٹا کی بنیاد پر کوئٹہ سمیت بلوچستان بھر میں سرچ آپریشنز شروع کر دیے ہیں۔ نادرا حکام نے واضح کیا ہے کہ اگر کسی پاکستانی شہری نے افغان شہری کو خاندانی رکن ظاہر کر کے قومی ریکارڈ میں شامل کیا، تو اس کے خلاف سخت قانونی کارروائی ہوگی، جس میں 30 لاکھ روپے جرمانہ اور 5 سال قید کی سزا ہو سکتی ہے، جبکہ ان کی پوری فیملی کے شناختی کارڈز بھی بلاک کر دیے جائیں گے۔
نادرا نے ایک اعلامیہ میں ان افراد کو بذریعہ اشتہار 15 روز کے اندر اپنے متعلقہ نادرا زونل آفس میں تمام ضروری دستاویزات کے ہمراہ پیش ہونے کی ہدایت کی ہے، بصورت دیگر یکطرفہ کارروائی کی جائے گی۔ اس بڑی کارروائی کے بعد صوبے بھر میں شہریوں میں بے چینی کی لہر دوڑ گئی ہے، کیونکہ کئی مقامی خاندانوں کو بھی غلط اندراج یا تصدیق میں غلطیوں کے باعث نقصان پہنچنے کا خدشہ ہے۔