عوام کے لیے شاندار ریلیف! وزیراعظم شہباز شریف کا قوم سے اہم خطاب؛ تمام مشورے مسترد، ڈیزل کی قیمت میں 135 روپے کی تاریخی کمی جبکہ پیٹرول 12 روپے فی لیٹر سستا کرنے کا اعلان

اسلام آباد (قدرت روزنامہ)وزیراعظم شہباز شریف نے قوم سے اپنے اہم خطاب میں پیٹرولیم مصنوعات کی قیمتوں میں نمایاں کمی کا اعلان کرتے ہوئے مہنگائی کے ستائے عوام کو بڑا ریلیف فراہم کیا ہے۔ وزیراعظم نے خطاب کے دوران انکشاف کیا کہ عالمی منڈی میں تیل کی قیمتوں میں کمی واقع ہونے کے بعد انہیں مشورہ دیا گیا تھا کہ فی الحال یہ ریلیف عوام کو منتقل نہ کیا جائے اور اس کے ذریعے اس 129 ارب روپے کے بوجھ کو ایڈجسٹ کیا جائے جو حکومت نے پچھلے دنوں سبسڈی کی مد میں برداشت کیا تھا۔ تاہم، وزیراعظم نے دو ٹوک الفاظ میں کہا کہ انہوں نے یہ تمام مشورے یکسر مسترد کر دیے ہیں اور فیصلہ کیا ہے کہ اس کمی کا براہِ راست فائدہ ہر صورت عوام کو پہنچنا چاہیے۔
وزیراعظم کے اعلان کے مطابق آج رات 12 بجے سے درج ذیل نئی قیمتیں نافذ العمل ہوں گی:
ڈیزل: قیمت میں 135 روپے فی لیٹر کی تاریخی کمی کی جا رہی ہے، جس کے بعد ڈیزل کی قیمت 520 روپے سے کم ہو کر 385 روپے ہو جائے گی۔
پیٹرول: قیمت میں 12 روپے فی لیٹر کمی کی جا رہی ہے، جس کے بعد پیٹرول کی قیمت 378 روپے سے کم ہو کر 366 روپے ہو جائے گی۔
مزید برآں، وزیراعظم شہباز شریف نے واضح کیا کہ ٹرانسپورٹرز، مال بردار گاڑیوں اور کسانوں کے لیے حکومت کی جانب سے جن مالی امداد اور سبسڈیز کا اعلان پہلے کیا گیا تھا، وہ منسوخ نہیں ہوں گی بلکہ اسی طرح جاری رہیں گی تاکہ عام آدمی کو زیادہ سے زیادہ معاشی فائدہ پہنچایا جا سکے۔