افغان کرکٹر زندگی اور موت کی کشمکش میں! شاہد آفریدی کا دل چھو لینے والا بیان آگیا

لاہور(قدرت روزنامہ)افغانستان کے سابق فاسٹ باؤلر شاپور زدران اس وقت شدید علالت کے باعث اسپتال کے انتہائی نگہداشت یونٹ (آئی سی یو) میں زیرِ علاج ہیں جس پر کرکٹ حلقوں اور مداحوں میں تشویش کی لہر دوڑ گئی ہے۔ 38 سالہ سابق کھلاڑی کی حالت کو نہایت نازک قرار دیا جا رہا ہے جبکہ اہلِ خانہ کی جانب سے بھی ان کی صحت کے حوالے سے اپڈیٹس جاری کی جا رہی ہیں اور عوام سے خصوصی دعاؤں کی اپیل کی گئی ہے۔

رپورٹس کے مطابق شاپور زدران کو ایک سنگین طبی مسئلے کے بعد فوری طور پر آئی سی یو منتقل کیا گیا جہاں ڈاکٹروں کی ٹیم ان کی حالت پر مسلسل نظر رکھے ہوئے ہے۔ علاج کے دوران بعض اوقات صورتحال انتہائی تشویشناک بھی رہی ہے جس کے باعث طبی ماہرین خصوصی نگرانی کر رہے ہیں۔

دوسری جانب پاکستان کے سابق کپتان شاہد آفریدی نے بھی ان کے لیے نیک خواہشات کا اظہار کیا ہے۔ انہوں نے سوشل میڈیا پلیٹ فارم ایکس پر بتایا کہ ان کی شاپور زدران کے بھائی سے بات ہوئی ہے اور ان کی حالت سن کر انہیں شدید افسوس ہوا۔

شاہد آفریدی نے اپنے پیغام میں کہا کہ زدران ہمیشہ میدان میں ایک فائٹر رہے ہیں اور وہ امید رکھتے ہیں کہ وہ اس مشکل وقت میں بھی ہمت کا مظاہرہ کریں گے۔

شاپور زدران نے افغانستان کی نمائندگی کرتے ہوئے ایک دہائی سے زائد عرصے تک خدمات انجام دیں۔ انہوں نے 44 ایک روزہ میچز میں 43 وکٹیں حاصل کیں جبکہ 36 ٹی ٹوئنٹی میچز میں 37 شکار کیے۔ وہ مختلف عالمی ٹورنامنٹس میں بھی افغانستان ٹیم کا حصہ رہے جن میں آئی سی سی مینز ٹی 20 ورلڈ کپ بھی شامل ہے۔

ان کے کیریئر کا ایک یادگار لمحہ آئی سی سی مینز ٹی 20 ورلڈ کپ کے دوران سامنے آیا جب انہوں نے اسکاٹ لینڈ کے خلاف افغانستان کی پہلی تاریخی فتح میں فیصلہ کن رنز اسکور کیے۔ اس کے علاوہ انہوں نے فرنچائز کرکٹ میں بھی مختصر مگر مؤثر حصہ لیا اور بنگلہ دیش پریمیئر لیگ میں بھی شرکت کی۔

سال 2025 میں شاپور زدران نے بین الاقوامی کرکٹ سے ریٹائرمنٹ کا اعلان کیا تھا تاہم ان کی خدمات اور ابتدائی دور میں افغانستان کرکٹ کے لیے کردار کو آج بھی سراہا جاتا ہے۔ اس وقت کرکٹ کمیونٹی اور مداح ان کی جلد صحتیابی کے لیے دعاگو ہیں اور امید کی جا رہی ہے کہ وہ اس مشکل مرحلے سے سرخرو ہو کر باہر آئیں گے۔