جنت مرزا کو فلم میں کاسٹ کرنا بڑی غلطی تھی، سید نور کا چونکا دینے والا اعتراف
لاہور(قدرت روزنامہ)پاکستانی فلم انڈسٹری کے معروف ہدایتکار اور پروڈیوسر سید نور نے مشہور ٹک ٹاکر جنت مرزا کو اپنی فلم میں کاسٹ کرنے کے فیصلے کو تباہ کن تجربہ قرار دیتے ہوئے اس پر کھل کر اظہارِ خیال کیا ہے۔
حال ہی میں سوشل میڈیا پر وائرل ہونے والے ایک انٹرویو کلپ میں سید نور سے سوال کیا گیا کہ آج کل سوشل میڈیا پلیٹ فارمز، خصوصاً انسٹاگرام اور ٹک ٹاک پر مقبول شخصیات کو ان کے فالوورز کی بنیاد پر فلموں میں شامل کیا جاتا ہے، اور آپ نے بھی ایسا ایک تجربہ کیا تھا جو خاطر خواہ کامیاب نہ ہو سکا۔
اس سوال کے جواب میں سید نور نے دوٹوک انداز میں کہا کہ جنت مرزا کو اپنی فلم میں لینا تباہی کے سوا کچھ نہیں تھا۔ انہوں نے اعتراف کیا کہ فلم پر بے حد محنت کی گئی، لیکن اس کے باوجود ناظرین سینما گھروں تک نہیں پہنچے۔
ہدایتکار کے مطابق ممکنہ طور پر عوام کا یہ تاثر تھا کہ جنت مرزا تو پہلے ہی روزانہ سوشل میڈیا پر دستیاب ہیں، لہٰذا انہیں بڑی اسکرین پر دیکھنے کے لیے سینما جانے کی ضرورت محسوس نہیں ہوئی۔
سید نور نے مزید کہا کہ ماضی میں فلمی ستاروں کی اپنی ایک مخصوص آڈینس ہوا کرتی تھی، لوگ پسندیدہ اداکاروں کی نئی فلموں کا بے چینی سے انتظار کرتے تھے، مگر اب حالات بدل چکے ہیں۔ ان کے بقول موجودہ دور میں صرف شہرت یا سوشل میڈیا فالوونگ کسی فلم کی کامیابی کی ضمانت نہیں رہی۔
انہوں نے اس بات پر زور دیا کہ فلمی دنیا میں کامیابی کے لیے محض آن لائن مقبولیت کافی نہیں بلکہ مضبوط کہانی، مؤثر اداکاری اور سینما کی کشش بنیادی اہمیت رکھتی ہے۔
سید نور کا یہ بیان پاکستانی شوبز انڈسٹری میں سوشل میڈیا اسٹارز کو فلموں میں کاسٹ کرنے کے بڑھتے رجحان پر ایک اہم سوالیہ نشان بھی چھوڑ گیا ہے۔
