سانحہ بلدیہ فیکٹری، زبیر چریا اور رحمان بھولا جیل سے رہا، ایم کیو ایم دفتر پہنچنے پر استقبال

کراچی(قدرت روزنامہ)بلدیہ فیکٹری کیس کے ملزمان زبیرعرف چریا اور رحمان عرف بھولا کو رہا کر دیا گیا.
سپرنٹنڈنٹ سینٹرل جیل عبدالکریم عباسی کے مطابق دونوں ملزمان سینٹرل جیل میں قید تھے جنہیں قانونی کارروائی کے بعد جیل سے رہا کر دیا گیا۔
بری ہونے والے ایم کیو ایم کارکنان رحمان بھولا اور زبیر کو سینٹرل جیل سے رہائی پانے کے بعد ایم کیو ایم مرکز بہادر آباد پہنچ گئے۔
دونوں کارکنان کا سینٹرل جیل سے باہر انیس قائم خانی ، رکن سندھ اسمبلی فہیم پٹنی ، شارق جمال ، فرقان اطیب اور عمیر صدیقی نے استقبال کیا۔
10جون کو سپریم کورٹ نے سانحہ بلدیہ ٹاؤن فیکٹری کیس کے مرکزی ملزمان رحمان بھولا اور زبیر چریا کو بری کرنے کا حکم دیا تھا۔
سپریم کورٹ کراچی رجسٹری نے سانحہ بلدیہ ٹاؤن فیکٹری کیس کے مرکزی ملزمان رحمان بھولا اور زبیر چریا کی اپیلوں پر بڑا فیصلہ سناتے ہوئے ان کی سزائے موت کو کالعدم قرار دے دیا اور دونوں ملزمان کو کیس سے بری کرنے کا حکم جاری کردیا۔
عدالتی کارروائی کے دوران ایم کیو ایم کی جانب سے بیرسٹر فروغ نسیم اور حسان صابر ایڈوکیٹ بطور وکیل عدالت میں پیش ہوئے۔
سماعت کے دوران وکیل صفائی حسان صابر نے موقف اختیار کیا کہ استغاثہ کے پاس ایسا کوئی ٹھوس ثبوت یا چشم دید گواہ موجود نہیں ہے، جس نے ملزمان کو فیکٹری میں آگ لگاتے ہوئے دیکھا ہو۔
عدالت نے وکلاء کے دلائل مکمل ہونے اور شواہد کا جائزہ لینے کے بعد دونوں ملزمان کی سزائے موت کے خلاف اپیلیں منظور کرتے ہوئے انہیں بری کر دیا۔
یاد رہے کہ ماتحت عدالت کی جانب سے دونوں ملزمان کو جرم ثابت ہونے پر سزائے موت کی سزا سنائی گئی تھی، جسے ملزمان نے سپریم کورٹ میں چیلنج کیا تھا۔
واضح رہے کہ کراچی کے علاقے بلدیہ ٹاؤن میں واقع گارمنٹس فیکٹری میں ستمبر 2012 میں لگنے والی ہولناک آگ کے نتیجے میں 256 معصوم محنت کش اور ملازمین زندہ جل کر جاں بحق ہو گئے تھے، جسے ملکی تاریخ کا بدترین صنعتی حادثہ اور سانحہ قرار دیا گیا تھا۔