کھڈکوچہ، انجیری کراس کے قریب کوئٹہ کراچی شاہراہ پر واقع پل دھماکے سے تباہ، ٹریفک معطل

کھڈکوچہ(قدرت روزنامہ)ضلع مستونگ کے علاقے کھڈکوچہ میں انجیری کراس کے مقام پر کوئٹہ۔کراچی قومی شاہراہ پر واقع ایک پل کو نامعلوم افراد نے دھماکہ خیز مواد نصب کر کے تباہ کر دیا، جس کے نتیجے میں پل مکمل طور پر منہدم ہو گیا اور قومی شاہراہ ہر قسم کی ٹریفک کے لیے بند ہو گئی۔ واقعے کے بعد دونوں اطراف گاڑیوں کی لمبی قطاریں لگ گئیں جبکہ مسافروں، ٹرانسپورٹرز اور مال بردار گاڑیوں کو شدید مشکلات کا سامنا کرنا پڑ رہا ہے۔
ذرائع کے مطابق زور دار دھماکے کی آواز دور دور تک سنی گئی، جس کے بعد علاقے میں خوف و ہراس پھیل گیا۔ دھماکے سے پل کو شدید نقصان پہنچا اور اس پر سے گاڑیوں کی آمدورفت فوری طور پر معطل کر دی گئی۔ خوش قسمتی سے ابتدائی اطلاعات کے مطابق دھماکے کے وقت پل پر کوئی گاڑی موجود نہیں تھی، جس کے باعث کسی جانی نقصان کی اطلاع موصول نہیں ہوئی، تاہم پل کی تباہی سے قومی شاہراہ کا زمینی رابطہ منقطع ہو گیا۔
واقعے کی اطلاع ملتے ہی قانون نافذ کرنے والے اداروں، لیویز، پولیس اور دیگر متعلقہ حکام نے جائے وقوعہ کا رخ کیا اور علاقے کو گھیرے میں لے کر شواہد اکٹھے کرنا شروع کر دییسیکیورٹی اہلکاروں نے شاہراہ کو ہر قسم کی ٹریفک کے لیے بند کر دیا جبکہ بم ڈسپوزل اور تفتیشی ٹیموں نے دھماکے کی نوعیت اور استعمال ہونے والے دھماکہ خیز مواد کا جائزہ لینا شروع کر دیا۔
انتظامیہ کے مطابق پل کی تباہی کے باعث کوئٹہ اور کراچی کے درمیان سفر کرنے والے ہزاروں مسافر متاثر ہوئے ہیں۔ شاہراہ بند ہونے سے بلوچستان کے مختلف اضلاع اور ملک کے دیگر حصوں کے درمیان تجارتی سرگرمیاں بھی متاثر ہونے کا خدشہ ہے، کیونکہ یہی شاہراہ صوبے کی اہم ترین تجارتی اور سفری گزرگاہوں میں شمار ہوتی ہے ذرائع کا کہنا ہے کہ متعلقہ ادارے متبادل راستوں کا جائزہ لے رہے ہیں، جبکہ محکمہ مواصلات اور نیشنل ہائی وے اتھارٹی کے حکام کو بھی پل کی بحالی اور شاہراہ کو دوبارہ ٹریفک کے لیے کھولنے کے حوالے سے آگاہ کر دیا گیا ہے۔
انجینئرنگ ٹیمیں نقصان کا تخمینہ لگانے کے بعد بحالی کے کام کا آغاز کریں گی دوسری جانب مقامی شہریوں اور مسافروں نے حکومت بلوچستان اور متعلقہ اداروں سے مطالبہ کیا ہے کہ پل کی فوری تعمیر و مرمت کو یقینی بنایا جائے، قومی شاہراہ پر سیکیورٹی مزید سخت کی جائے اور ایسے واقعات کی روک تھام کے لیے مثر اقدامات کیے جائیں تاکہ عوام کو مزید مشکلات کا سامنا نہ کرنا پڑے۔ حکام کا کہنا ہے کہ واقعے کی مکمل تحقیقات جاری ہیں اور ذمہ دار عناصر کا سراغ لگا کر انہیں قانون کے کٹہرے میں لایا جائے گا، جبکہ پل کی بحالی تک عوام سے اپیل کی گئی ہے کہ غیر ضروری سفر سے گریز کریں اور متبادل راستوں سے متعلق انتظامیہ کی ہدایات پر عمل کریں۔