چین سے تجارتی تعلقات بند کر دیں آپ کی معیشت ٹھیک ہو جائے گی، شبر زیدی

اسلام آباد(قدرت روزنامہ)سابق چیئرمین فیڈرل بورڈ آف ریونیو (ایف بی آر) شبر زیدی نے دعویٰ کیا ہے کہ اگر پاکستان چین کے ساتھ اپنے تجارتی تعلقات بند کر دے تو ملکی معیشت بہتر ہو سکتی ہے۔ انہوں نے کہا کہ چین نے پاکستان کی معیشت کو جتنا نقصان پہنچایا، اتنا امریکا بھی نہیں پہنچا سکا۔ ایک پروگرام میں گفتگو کرتے ہوئے شبر زیدی نے کہا کہ وہ پہلے دن سے چین پاکستان اقتصادی راہداری (سی پیک) کے مخالف رہے ہیں۔
ان کا کہنا تھا کہ سی پیک کو “گیم چینجر” قرار دے کر عوام کو بیوقوف کیا گیا، جبکہ اس کے تحت مہنگے ترین بجلی منصوبے لگائے گئے جنہوں نے ملک کی معیشت کو نقصان پہنچایا۔ انہوں نے الزام عائد کیا کہ توانائی کے ان منصوبوں کے باعث بجلی کی قیمتوں میں اضافہ ہوا اور معیشت پر بھاری بوجھ پڑا۔

چین سے تجارتی تعلقات بند کر دیں آپ کی معیشت ٹھیک ہو جائے گی چین نے جتنا نقصان پاکستان کی معیشت کو پہنچایا اتنا امریکہ نے نہیں پہنچایا میں پہلے دن سے سی پیک کے خلاف ہوں , گیم چینجر ہے گیم چینجر ہے آپ نے لوگوں کو بیوقوف بنایا اور بجلی کے مہنگے ترین منصوبے لگا کر ملک کی تباہی کر دی… pic.twitter.com/8q8ci5n84s

— AMJAD KHAN (@iAmjadKhann) August 5, 2026

سابق چیئرمین ایف بی آر نے کہا کہ پاکستان کو اپنی معاشی پالیسیوں پر نظرثانی کرتے ہوئے ایسے فیصلے کرنے چاہئیں جو قومی معیشت کے مفاد میں ہوں۔
پاکستان کی پوری تاریخ میں معیشت کو ترجیح نہیں دی گئی۔ انہوں نے کہا کہ اگر کوئی انہیں پاکستان کی تاریخ میں معیشت پر توجہ دینے کی ایک بھی مثال دکھا دے تو وہ اپنا نام “نیتن یاہو” یا “نریندر مودی” رکھ لیں گے۔ شبر زیدی کا کہنا تھا کہ ملک میں ہمیشہ سیاسی اور دیگر معاملات کو ترجیح دی گئی، جبکہ معیشت کو نظر انداز کیا جاتا رہا۔ انہوں نے کہا کہ جب تک معاشی اصلاحات کو اولین ترجیح نہیں دی جائے گی، ملک کو درپیش اقتصادی مسائل حل نہیں ہو سکیں گے۔