متحدہ عرب امارات نے امریکی ایئر بیس پر ایرانی ڈرون حملے کی تردید کردی
دبئی(قدرت روزنامہ) متحدہ عرب امارات نے ان خبروں کی تردید کردی ہے جن میں دعویٰ کیا گیا تھا کہ ایران نے امریکی فوجیوں کی میزبانی کرنے والے المنہاد ایئربیس پر میزائل حملہ کیا ہے۔
خبر رساں ادارے اے ایف پی کے مطابق اماراتی وزارت دفاع نے سوشل میڈیا پلیٹ فارم ایکس پر جاری بیان میں کہا کہ المنہاد ایئربیس پر میزائل حملے سے متعلق میڈیا رپورٹس بے بنیاد ہیں۔
یہ وضاحت اس وقت سامنے آئی جب ایران کی جانب سے دعویٰ کیا گیا تھا کہ اس نے المنہاد ایئربیس کو درجنوں حملہ آور ڈرونز کے ذریعے نشانہ بنایا ہے۔ ایران کے مطابق اس کارروائی میں اس مقام کو ہدف بنایا گیا جہاں امریکی فوجی اہلکار اور ہیلی کاپٹرز موجود تھے۔
دوسری جانب متحدہ عرب امارات نے اس سے قبل اعلان کیا تھا کہ اس کی فضائی دفاعی فورسز نے ایرانی سمت سے آنے والے ایک ڈرون کو اپنی علاقائی حدود کے اوپر روک لیا ہے۔
اماراتی وزارت دفاع کے مطابق ملک کی مسلح افواج مکمل الرٹ پر ہیں اور کسی بھی ممکنہ خطرے کا جواب دینے کے لیے تیار ہیں۔ اماراتی فضائی حدود کی مسلسل نگرانی اور مشتبہ اہداف کی ٹریکنگ بھی جاری ہے۔
ایران اور متحدہ عرب امارات کے درمیان یہ تازہ کشیدگی ایسے وقت میں سامنے آئی ہے جب خطے میں امریکا اور ایران کے درمیان فوجی تنازع شدت اختیار کرچکا ہے۔ دونوں جانب سے ایک دوسرے کے فوجی اہداف کو نشانہ بنانے کے دعووں کے باعث خلیجی ممالک میں سکیورٹی خدشات بھی بڑھ گئے ہیں۔
المنہاد ایئربیس متحدہ عرب امارات میں واقع ایک اہم فوجی اڈہ ہے جہاں امریکی فوجی سرگرمیوں کی موجودگی بھی رہی ہے۔ تاہم تازہ ایرانی دعوے کے بارے میں اماراتی حکام نے واضح طور پر کہا ہے کہ میزائل حملے کی اطلاعات درست نہیں۔
اماراتی حکام نے عوام پر بھی زور دیا ہے کہ وہ سکیورٹی صورتحال سے متعلق معلومات کے لیے صرف سرکاری اور معتبر ذرائع پر انحصار کریں اور افواہوں یا گمراہ کن خبروں سے گریز کریں۔
