’بجلی اور پٹرول کیساتھ حکومت سے روٹی سستی کرنے کا بھی مطالبہ کرتے ہیں‘

پشاور(قدرت روزنامہ)امیر جماعت اسلامی حافظ نعیم الرحمان نے کہا ہے کہ جماعت اسلامی کی پٹرولیم لیوی کیخلاف جدوجہد کو سب سراہ رہے ہیں۔

پشاور میں گفتگو کرتے ہوئے انہوں نے کہا کہ عوام کی قوتِ خرید ختم ہو رہی ہے آئی پی پیز کیخلاف دھرنے پر بھی کچھ لوگوں نے تکلیف کی شکایت کی تھی تاہم دھرنے کے نتیجے میں حکومت آئی پی پیز سے بات کرنے پر مجبور ہوئی۔

حافظ نعیم الرحمان نے کہا کہ ایسا ہو نہیں سکتا دھرنے سے کسی کو تکلیف نہ ہو، چترال سےکراچی تک ملک بھر میں دھرنے ہو رہے ہیں جماعت اسلامی کے علاوہ کونسی دوسری سیاسی جماعت عوام کیلئےآواز اٹھا رہی ہے۔

ان کا کہنا تھا کہ پاک افغان بارڈر کے لیے جماعت اسلامی نے بہت کام کیا ہے ابتدائی طور پر پاک افغان بارڈر پر ٹریڈزون بنانے کا مطالبہ کیا ہے دونوں ملکوں کے درمیان گزشتہ دنوں سےبات چیت کاسلسلہ شروع ہو چکا ہے بارڈر ٹریڈ زون بہتر بنا کر اور گرینڈ جرگہ تشکیل دے کر صورتحال بہتر بنا سکتے ہیں۔

حافظ نعیم نے کہا کہ بجلی اورپٹرول کیساتھ حکومت سے روٹی سستی کرنےکا بھی مطالبہ کرتے ہیں، تاجر برادری سے درخواست ہے ہڑتال کے بغیر حکومت کے کان پر جوں نہیں رینگتی، حکومت نے ہماری تعلیم اور ترقی کی شاہراہ بند کر رکھی ہے۔

انہوں نے مزید کہا کہ پشاور دھرنے کے حوالے سے آج جماعت اسلامی کی قیادت سےبات کروں گا عوام کے پاس جماعت اسلامی کے سوا کوئی آپشن نہیں، بالآخر عوام ہماری طرف آئیں گے، عوام کے مسائل اور ایشوز صرف جماعت اسلامی کا ایجنڈا ہیں، 3ستمبر کو تاریخی ہڑتال ہو گی۔