ہماری نسل نے طاقت کے سامنے خاموش رہنا سیکھ لیا، جسٹس ریٹائرڈ منصور علی شاہ

اسلام آباد(قدرت روزنامہ)سپریم کورٹ کے سابق سینئر ترین جج جسٹس ریٹائرڈ منصور علی شاہ نے ملک کے موجودہ نظامِ عدل، عدالتی سمجھوتوں اور پاکستان کی نوجوان نسل کے مستقبل پر گہرے اور تلخ سچائیوں پر مبنی خیالات کا اظہار کردیا۔ انگریزی اخبار ڈان میں شائع ہونے والے اپنے ایک مضمون میں انہوں نے ماضی کی یادیں تازہ کرتے ہوئے لکھا کہ جب ملک میں مارشل لا نافذ ہوا تو میری عمر محض 14 سال تھی اور جب وہ آمریت کا حامل جنرل انتقال کرگیا تو میں ایک نوجوان بن چکا تھا، ہماری نسل نے ایک انتہائی خطرناک سبق سیکھا کہ اقتدار اپنے اعمال کی کبھی وضاحت نہیں کرتا، جو شخص حق کے لیے آواز اٹھاتا ہے اس کا تبادلہ کر دیا جاتا ہے، جو خاموش رہتا ہے اسے ترقی ملتی ہے اور جو جج اپنی خودمختاری اور آزادی پر اصرار کرتا ہے اسے راستے سے ہٹا دیا جاتا ہے۔
انہوں نے خبردار کیا کہ احتیاط اگر طویل عرصے تک اختیار کی جائے تو وہ آہستہ آہستہ سمجھوتے میں بدل جاتی ہے، اور یہی سمجھوتہ آخرکار مکمل فرمانبرداری کا روپ دھار لیتا ہے، جس کے نتیجے میں قومیں اقتدار کے سامنے سمجھوتہ کرنا سیکھ جاتی ہیں، میں نے ایسے لوگوں کو اپنی آنکھوں سے دیکھا ہے جو عدالت کی بار میں بے خوف اور نڈر ہو کر کھڑے ہوتے تھے لیکن بنچ پر پہنچتے ہی ان کے رویے اور اصول یکسر بدل گئے۔

جسٹس منصور علی شاہ نے آج ڈان میں کالم لکھا ہے کہ پاکستان کی ہر تین میں سے دو افراد کی عمر 30 سال سے کم ہے۔ سوال یہ نہیں کہ جنریشن زی (Generation Z) پاکستان کو تبدیل کرے گی یا نہیں، بلکہ آبادی کے اعتبار سے یہ تبدیلی ضرور آئے گی۔ اصل سوال یہ ہے کہ کیا پاکستان اس تبدیلی کے لیے تیار…

— Hussain Ahmed Ch (@HussainAhmedCh8) September 20, 2026

منصور علی شاہ لکھتے ہیں کہ یہ تبدیلی نہ تو اچانک آتی ہے اور نہ ہی ہمیشہ پیسوں کی وجہ سے ہوتی ہے بلکہ عہدے اور اختیارات کی آسائش آہستہ آہستہ اپنا اثر دکھاتی ہے اور پھر ہر ناگزیر سمجھوتے کو حقیقت پسندی کا خوبصورت نام دے دیا جاتا ہے، پاکستان کی آبادی میں ہر تین میں سے دو افراد کی عمر 30 سال سے کم ہے، سوال یہ نہیں کہ جنریشن زی پاکستان کو تبدیل کرے گی یا نہیں بلکہ آبادی کے اس بڑے تناسب کی وجہ سے یہ تبدیلی ہر صورت آئے گی، اصل سوال یہ ہے کہ کیا پاکستان اور اس کے ادارے اس بڑی تبدیلی کے لیے خود کو تیار کریں گے؟۔
انہوں نے زور دیا کہ پاکستان کی اگلی نسل کی تعمیر گلی محلوں کے احتجاج سے نہیں بلکہ فکر، منطق اور سنجیدہ بحث سے ہوگی، جس کی شروعات ہماری یونیورسٹیوں کے کلاس رومز سے ہونی چاہیے، ہر کلاس روم کو ایک چھوٹی جمہوری ریاست کا روپ دھارنا چاہیے جہاں طلبہ محض نصاب رٹنے کے بجائے اپنے شعبے کے اخلاقی اور آئینی سوالات پر کھلم کھلا بحث کریں۔ سپریم کورٹ کے سابق جج کا کہنا ہے کہ الیکشن لڑنے، ہار مان کر بھی جیتنے والے کے ساتھ مل کر کام کرنے اور اختلافِ رائے کو تحفظ دینے سے ہی جمہوریت اور قومی کردار کی اصل بنیاد پڑتی ہے، جب نوجوانوں کو نظریاتی تعلیم کے ساتھ ساتھ عدالتوں، ہسپتالوں اور کارخانوں کے ماحول جیسے تلخ زمینی حقائق سے جوڑا جائے گا، تو وہ ایک ایسا باصلاحیت اور باشعور معاشرہ بنائیں گے جسے آئین و عوام کی مرضی کے بغیر نااہل یا غیر جمہوری قوتوں کے ذریعے کبھی نہیں چلایا جا سکے گا۔