متحدہ عرب امارات میں بین الامارات ریل سفر کے نئے دور کا آغاز

دبئی(قدرت روزنامہ) متحدہ عرب امارات میں بین الامارات ریل سفر کے نئے دور کا آغاز ہوگیا۔

بدھ 30 ستمبر کی صبح دبئی کے ایلایس اسٹیشن پر اتحاد ریل کی مسافر ٹرین سروس کے آغاز کے موقع پر خاصی گہماگہمی رہی۔

سورج طلوع ہونے سے پہلے ہی آن لائن ٹکٹ بک کرنے والے مسافر اسٹیشن پہنچ گئے جبکہ میڈیا نمائندوں اور غیر ملکی مسافروں کی بڑی تعداد بھی تاریخی ریل سفر کا حصہ بننے کے لیے موجود تھی۔

اتحاد ریل نے مسافروں کا استقبال مفت ناشتے اور یادگاری تحائف سے کیا۔ جیو سے گفتگو میں مسافروں نے خوشی کا اظہار کرتے ہوئے کہا کہ وہ خود کو خوش قسمت سمجھتے ہیں کہ دبئی میں اس تاریخی سفر کا حصہ بنے۔

ٹرین کی روانگی سے پہلے اسٹیشن پر موجود مجمع کے درمیان اچانک غیر ملکی فنکاروں نے فلیش ڈانس بھی پیش کیا جس پر مسافروں نے خوشگوار حیرت کا اظہار کیا۔

اس کے بعد ٹرین کی روایتی سیٹی بجائی گئی اور اعلان کیا گیا کہ پہلی ٹرین روانگی کے لیے تیار ہے۔

مسافروں سے بھری پہلی ٹرین صبح 6 بج کر 14 منٹ پر دبئی سے ابوظبی کے لیے روانہ ہوئی اور 7 بج کر 18 منٹ پر ابوظبی اسٹیشن پہنچی یوں یہ سفر ایک گھنٹہ 4 منٹ میں مکمل ہوا۔

اتحاد ریل کے مطابق دبئی اور ابوظبی کے درمیان روزانہ 10 مسافر ٹرینیں چلیں گی، جبکہ ابوظبی سے فجیرہ (جو متحدہ عرب امارات کی مشرقی ساحلی ریاست ہے) کے لیے روزانہ تین دو طرفہ ٹرین سفر ہوں گے۔

دبئی سے ابوظبی کا کمفرٹ کلاس کرایہ 39 درہم اور پریمیم کلاس 109 درہم سے شروع ہوتا ہے جبکہ فجیرہ کے لیے کم از کم کرایہ 29 درہم ہے۔

دبئی کا مرکزی ایلایس اسٹیشن دبئی میٹرو کے جمیرہ گالف اسٹیٹس اسٹیشن سے تقریباً 400 میٹر طویل برج کے ذریعے منسلک ہے جہاں سے مسافر دبئی میٹرو کی ریڈ لائن استعمال کرکے دبئی کے مختلف علاقوں تک پہنچ سکیں گے۔

اتحاد ٹرین میں وائی فائی، موبائل چارجنگ اور سامان رکھنے کی سہولت بھی موجود ہے جبکہ مسافر ٹکٹ اتحاد ریل کی موبائل ایپ، ویب سائٹ اور اسٹیشنوں پر موجود ٹکٹ مشینوں سے حاصل کرسکتے ہیں۔