پاکستان کی شکست، مگر حسن نواز کی بیٹنگ نے سب کو متاثر کردیا

لاہور(قدرت روزنامہ)سابق قومی کپتان شاہد آفریدی نے ایشین گیمز کے کرکٹ فائنل میں بھارت کے خلاف حسن نواز کی شاندار اننگز کی بھرپور تعریف کی ہے۔
ہانگژو میں کھیلے گئے فائنل میں بھارت نے پاکستان کو 19 رنز سے شکست دے کر گولڈ میڈل اپنے نام کرلیا، جبکہ پاکستان کو سلور میڈل پر اکتفا کرنا پڑا۔بھارتی ٹیم نے ٹاس جیت کر پہلے بیٹنگ کرتے ہوئے مقررہ اوورز میں پاکستان کو 212 رنز کا ہدف دیا۔ جواب میں پاکستانی ٹیم مقررہ اوورز میں 192 رنز بنا سکی۔
پاکستان کی جانب سے حسن نواز نے شاندار بیٹنگ کا مظاہرہ کرتے ہوئے 96 رنز کی اننگز کھیلی، تاہم ان کی عمدہ کارکردگی ٹیم کو فتح دلانے کے لیے کافی ثابت نہ ہوسکی۔ دیگر بیٹرز میں صائم نے 29، معاذ نے 23، فرحان نے 10، عبدالصمد نے 9 جبکہ عثمان نے 3 رنز بنائے۔
شکست کے باوجود حسن نواز کی اننگز نے سابق کرکٹرز کی توجہ حاصل کی۔ شاہد آفریدی نے سماجی رابطے کی ویب سائٹ ایکس پر حسن نواز کی تعریف کرتے ہوئے کہا کہ انہوں نے انتہائی شاندار اننگز کھیلی، جو اعلیٰ معیار کی تھی اور ہر لحاظ سے گولڈ میڈل کے قابل تھی۔
شاہد آفریدی نے قومی ٹیم کے کھلاڑیوں کی حوصلہ افزائی کرتے ہوئے کہا کہ ہمت نہ ہاریں، انہیں پاکستان کی جانب سے مقابلہ کرنے کا انداز بہت پسند آیا۔ سابق کپتان محمد یوسف نے بھی شاہد آفریدی کے خیالات کی تائید کی اور بھارت کے خلاف حسن نواز کی کارکردگی کو مضبوط قرار دیا۔
محمد یوسف کے مطابق حسن نواز نے زبردست کارکردگی کا مظاہرہ کیا اور بین الاقوامی کرکٹ میں اپنی گزشتہ فارم کا تسلسل برقرار رکھا۔ ان کا کہنا تھا کہ پاکستان نے کامیابی کے حصول کے لیے مختلف پہلوؤں میں مثبت پیش رفت کی ہے۔