عمران خان کے کزن قاسم زمان کو تحویل میں لے لیا گیا

اسلام آباد (قدرت روزنامہ) پاکستان تحریک انصاف کے بانی چیئرمین عمران خان کے کزن قاسم زمان کو پولیس نے اپنی تحویل میں لے لیا۔ اطلاعات کے مطابق قاسم زمان بانی پی ٹی آئی سے فیملی کی ملاقات کے مقررہ دن پر ان سے ملنے کے لیے راولپنڈی کی اڈیالہ جیل کے باہر پہنچے تھے، جہاں پولیس نے انہیں فیکٹری ناکے سے تحویل میں لے کر قریبی پولیس چوکی منتقل کر دیا، اس واقعے کے بعد پی ٹی آئی کے چیئرمین بیرسٹر گوہر نے قاسم زمان کی فوری رہائی اور اس معاملے کو حل کرنے کے لیے اعلیٰ سطح پر رابطے شروع کردیئے۔

بیرسٹر گوہر علی خان کی قاسم خان کی گرفتاری پر شدید رد عمل

مجھے اطلاع ملی ہے قاسم زمان کو اٹھا لیا گیا ہے قاسم زمان غیر سیاسی ہے قاسم زمان نے آج تک پریس کانفرنس نہیں کی میڈیا سے بات نہیں کی اس کا اٹھائے جانا افسوس ناک ہے خدارا لوگوں کو اٹھانے کا سلسلہ بند کیا جائے ۔ https://t.co/VtZ2BEJm9P

— Zimal Zahoor PTI (@zimalzahor) October 6, 2026

پاکستان تحریک انصاف کے بانی چیئرمین عمران خان کے کزن قاسم زمان کی پولیس کی جانب سے تحویل میں لیے جانے کے واقعے پر چیئرمین پی ٹی آئی بیرسٹر گوہر علی خان نے انتہائی شدید ردعمل کا اظہار کیا، میڈیا سے گفتگو کرتے ہوئے بیرسٹر گوہر نے کہا کہ مجھے اطلاع ملی ہے کہ قاسم زمان کو اٹھا لیا گیا۔
ان کا کہنا تھا کہ قاسم زمان ایک مکمل طور پر غیر سیاسی شخص ہیں جنہوں نے آج تک نہ تو کوئی پریس کانفرنس کی ہے اور نہ ہی کبھی میڈیا سے کوئی بات چیت کی ہے، ایسے غیر سیاسی اور پرامن شخص کو اس طرح حراست میں لیا جانا انتہائی افسوسناک عمل ہے، خدارا! لوگوں کو اس طرح اٹھانے کا سلسلہ اب بند کیا جانا چاہیے۔