اکشے کمار، رجنی کانت، انوپم کھیر اور دیگر نامور شخصیات کا نانا پاٹیکر کو خراجِ تحسین

نئی دہلی(قدرت روزنامہ): بھارتی سینما کے بے مثال اداکار نانا پاٹیکر کی ناگہانی موت نے پوری فلم انڈسٹری کو سوگوار کر دیا ہے۔

75 برس کی عمر میں دل کا دورہ پڑنے سے انتقال کرنے والے اس لیجنڈری اداکار نانا پاٹیکر کو خراجِ تحسین پیش کرنے کے لیے بالی ووڈ، ساؤتھ انڈین فلم انڈسٹری اور موسیقی کے شعبے سے وابستہ نامور شخصیات نے سوشل میڈیا پر گہرے دکھ اور صدمے کا اظہار کیا ہے۔

اکشے کمار نے نانا پاٹیکر کے ساتھ فلموں “ویلکم” اور “ہاؤس فل 5” میں کام کرنے کی یادیں تازہ کرتے ہوئے کہا کہ نانا کو کبھی سامعین کی توجہ حاصل کرنے کے لیے زیادہ محنت نہیں کرنی پڑتی تھی کیونکہ ان کی آواز، شدت اور ایمانداری بے مثال تھی۔

انوپم کھیر نے جذباتی پیغام میں کہا کہ نانا پاٹیکر بھارتی سینما کے بہترین اداکاروں اور انسانوں میں سے ایک تھے جو انتہائی نڈر اور بے باک شخصیت کے مالک تھے۔

تھلائیوا رجنیکانت نے اپنی گہری دوستی کا ذکر کرتے ہوئے ایکس پر لکھا کہ انہیں یقین نہیں آ رہا کہ ان کے پیارے دوست نانا اب اس دنیا میں نہیں رہے۔

رتیش دیشمکھ نے انہیں خراجِ تحسین پیش کرتے ہوئے ان کی حکمت، گفتگو اور حوصلہ افزائی کو یاد کیا اور ان کے جانے کو ایک دور کا خاتمہ قرار دیا۔

عالیہ بھٹ نے کہا کہ نانا سر نے دنیا کو ہنسایا، رلایا اور محسوس کروایا، ان جیسا کوئی دوسرا نہیں ہو سکتا۔ پکاش راج، رام گوپال ورما، وویک اگنی ہوتری، جونیئر این ٹی آر، منوج باچپائی، ارمان ملک، پریش راول اور مکیش چھابڑا سمیت دیگر فنکاروں نے بھی اپنے الگ انداز میں نانا پاٹیکر کو یاد کیا۔

رام گوپال ورما نے انہیں “اداکاری کا خدا” قرار دیا جبکہ وویک اگنی ہوتری نے صدمے کا اظہار کرتے ہوئے کہا کہ انہوں نے ری ٹیک کا موقع بھی نہیں دیا۔ تمام فنکاروں کا کہنا تھا کہ نانا پاٹیکر کی جاندار اداکاری، سچی شخصیت اور انمٹ نقوش ہمیشہ بھارتی سینما کی تاریخ میں زندہ رہیں گے۔