مریم نور نے روم شیئرنگ کا دردناک قصہ سنا دیا

لاہور(قدرت روزنامہ) پاکستان شوبز انڈسٹری کی خوبرو اداکارہ مریم نور نے کراچی شفٹ ہونے کے بعد روم شیئرنگ کا دردناک قصہ سنا دیا۔حال ہی میں اداکارہ مریم نور نجی ٹی وی کے شو میں شریک ہوئیں جہاں انہوں نے مختلف موضوعات پر کھل کر اظہار خیال کیا۔
پروگرام کے دوران میزبان نے اداکارہ سے سوال کیا کہ کیا کوئی ایسی شیئرنگ کی جو گلے پڑی ہو؟ جس پر مریم نور کا کہنا تھا کہ جب میں کراچی میں شفٹ ہوئی تو اس وقت میں نے ایک شیئرنگ اپارٹمنٹ میں رہائش اختیار کی تھی۔اداکارہ کا کہنا تھا کہ لاہور سے شہر قائد شفٹ ہونے والوں کی یہی خواہش ہوتی ہے کہ وہ ایک خوبصورت اور صاف ستھری جگہ میں رہیں لیکن مہنگی رہائش گاہ ہر ایک افورڈ نہیں کرسکتا۔
انہوں نے بتایا کہ کراچی شفٹ ہونے کے بعد میری ملاقات ایک بہت سلجھی اور سیدھی سادھی نظر آنے والی لڑکی سے ہوئی جس نے مجھے آفر دی کہ ہم شیئرنگ پر ایک اپارٹمنٹ لے لیتے ہیں، اس دوران مجھے میرے گھر والوں نے سمجھایا کہ میں سستا اپارٹمنٹ کرائے پر لے لوں لیکن شیئرنگ پر نہ لوں لیکن میں نے والدین کو کہا کہ ایسا کچھ نہیں لڑکی اچھی ہے کچھ نہیں ہوگا۔
ان کا کہنا تھا کہ وہ لڑکی گاؤں سے آئی ہوئی تھی، شروع میں بہت سیدھی سادھی لگی لیکن کچھ مہینوں میں ہی اس نے اپنا رنگ دکھانا شروع کردیا، مجھے اس کے ساتھ ایک اپارٹمنٹ میں رہتے ہوئے یہ محسوس ہونے لگا کہ میں ایک نوکرانی ہوں جو شیئرنگ پر نہیں بلکہ اس کے پیسوں پر اس گھر میں رہ رہی ہوں۔
بات جاری رکھتے ہوئے مریم نور نے کہا کہ لہٰذا کچھ ہی مہینوں بعد میں نے اس لڑکی سے علیحدہ رہنے کا فیصلہ کیا، اس کے بعد جب ایک روز میں لاہور گئی تو اس کی کال آئی کہ میں نے اپنے لیے گھر خرید لیا ہے لہٰذا اب میں اسے اپارٹمنٹ کا ڈیپوزٹ واپس کردوں جس پر میں نے اس لڑکی کو دو مہینے کا کنٹریکٹ یاد دلایا اور کہا کہ یہ پیسے دو مہینے بعد ہی دوں گی۔
مریم کا مزید کہنا تھا کہ لیکن اس کے بعد جب میں کراچی آئی تو وہ لڑکی میری چیزیں چوری کرکے لے گئی، میرے کمرے میں مرے ہوئے جھینگے پھینک گئی، یہی نہیں بلکہ میرے برتنوں میں خراب کھانا بھی ڈال گئی۔