کیا ایپل آئی فون ایئر 2 بڑا سرپرائز دینے جارہا ہے؟ لانچ اور نئے فیچرز سے متعلق اہم تفصیلات

نیویارک(قدرت روزنامہ)ایپل کے آئندہ الٹرا سلم اسمارٹ فون iPhone Air 2 کے حوالے سے نئی تفصیلات سامنے آگئی ہیں، جن کے مطابق کمپنی اس بار صارفین کی شکایات کو مدنظر رکھتے ہوئے کیمرا، بیٹری اور کولنگ سسٹم میں نمایاں بہتری متعارف کرانے کی منصوبہ بندی کر رہی ہے۔

غیر ملکی میڈیا رپورٹس کے مطابق پہلی نسل کے iPhone Air کی انتہائی پتلی ساخت کو تو صارفین نے پسند کیا تاہم اس میں صرف ایک ریئر کیمرا اور نسبتاً کم بیٹری لائف کو اس کی بڑی کمزوریاں قرار دیا گیا تھا۔

رپورٹس میں بتایا گیا ہے کہ ایپل نئے iPhone Air 2 میں پہلی بار دو ریئر کیمروں کا نظام متعارف کرا سکتا ہے، جس میں مین کیمرا کے ساتھ الٹرا وائیڈ لینس بھی شامل ہونے کا امکان ہے۔ اس سے صارفین کو فوٹوگرافی کے مزید بہتر اور متنوع آپشنز دستیاب ہوں گے۔

بیٹری کے حوالے سے بھی اہم پیش رفت سامنے آئی ہے۔ سپلائی چین سے وابستہ ذرائع کا دعویٰ ہے کہ iPhone Air 2 میں تقریباً 3,500mAh بیٹری دی جا سکتی ہے، جو موجودہ ماڈل کی 3,149mAh بیٹری کے مقابلے میں 10 فیصد سے زائد بڑی ہوگی۔ اس کے علاوہ نئے A20 Pro پروسیسر کی بہتر توانائی بچانے والی صلاحیت بھی بیٹری ٹائمنگ میں اضافہ کر سکتی ہے۔

رپورٹس کے مطابق ایپل اپنے پرو ماڈلز میں استعمال ہونے والا ویپر چیمبر کولنگ سسٹم بھی iPhone Air 2 میں شامل کرنے پر غور کر رہا ہے، جس سے فون زیادہ دیر تک بہتر کارکردگی دکھا سکے گا اور زیادہ گرم ہونے کے امکانات بھی کم ہوں گے۔

ابتدائی اطلاعات کے مطابق iPhone Air 2 کو ستمبر 2026 میں متعارف کرایا جانا تھا تاہم تازہ رپورٹس بتاتی ہیں کہ اب اس کی لانچ 2027 میں متوقع ہے جہاں اسے نئے iPhone 18 کے ساتھ پیش کیا جا سکتا ہے۔

واضح رہے کہ ایپل نے تاحال iPhone Air 2 کے بارے میں کوئی باضابطہ اعلان نہیں کیا، اس لیے سامنے آنے والی تمام معلومات مختلف ذرائع اور لیکس پر مبنی ہیں۔