پنجاب پر مسلط لوگ اسٹیبلشمنٹ کے کندھوں پر چڑھ کر آئے ہیں ان کو عوام کی فکر نہیں، جنید اکبر

اسلام آباد(قدرت روزنامہ)پاکستان تحریک انصاف خیبرپختونخواہ کے صدر اور رکن قومی اسمبلی جنید اکبر خان نے پنجاب حکومت اور ملکی سیاسی صورتحال پر شدید تنقید کرتے ہوئے کہا ہے کہ پنجاب پر مسلط لوگ اسٹیبلشمنٹ کے کندھوں پر چڑھ کر اقتدار میں آئے ہیں، اسی لیے انہیں عوام کی کوئی فکر نہیں ہے اور وہ سرکاری وسائل پر عیاشیاں کر رہے ہیں، اس کے برعکس خیبرپختونخواہ میں عوام کی حقیقی منتخب حکومت قائم ہے جہاں کسی قسم کی عیاشیاں نہیں ہوتیں اور عوامی وسائل کا تحفظ کیا جاتا ہے۔

پنجاب پر مسلط لوگ اسٹیبلشمنٹ کے کندھوں پر چڑھ کر آئے ہیں، اس لیے ان کو عوام کی فکر نہیں ہے اور وہ عیاشیاں کرتے ہیں لیکن خیبرپختونخوا میں عوامی حکومت ہے اور وہاں عیاشیاں نہیں ہوتیں،

جنید اکبر خان pic.twitter.com/6BBO7W54Ha

— Ahmad Hassan Bobak (@ahmad__bobak) September 18, 2026

اینکرپرسن عاصمہ چوہدری کے ساتھ گفتگو کرتے ہوئے انہوں نے کہا کہ قید کے دوران ان کی عمران خان سے چار مرتبہ ملاقاتیں ہوئی ہیں اور ہر بار ان کے بلند مورال اور چٹان جیسے حوصلے کو دیکھ کر وہ دنگ رہ جاتے تھے، عمران خان سخت ترین جیل کی صعوبتیں اور مشکلات برداشت کرنے کے باوجود باہر سے آنے والے رہنماؤں کو تسلی دیتے تھے اور ہدایت کرتے تھے کہ ظلم اور فاشزم کے سامنے ڈٹے رہو، یہ نا انصافی اور ظلم کا نظام زیادہ دیر نہیں چل سکے گا اور ملک میں ان شاء اللہ جلد قانون کی حکمرانی قائم ہوگی۔
پی ٹی آئی رہنما کا مزید کہنا تھا کہ حکمرانوں اور مخالفین کو اصل تکلیف اس بات کی ہے کہ وہ اتنے مظالم اور سخت حالات کے باوجود عمران خان کا روح اور جذبہ توڑنے میں مکمل ناکام رہے ہیں، جیل میں عمران خان کا ایک ایک لفظ اور بات ریکارڈ کی جاتی ہے، ملاقات کے دوران عمران خان نے مجھ سے کہا تھا کہ وہ اللہ تعالی کے شکر گزار ہیں کہ جیل کے اس عرصہ تنہائی میں انہیں بہت کچھ سیکھنے اور سمجھنے کا موقع ملا ہے جو شاید باہر رہتے ہوئے ممکن نہ ہوتا، اور وہ سارا دن اپنی ماضی کی غلطیوں کا جائزہ لیتے ہیں تاکہ آئندہ اقتدار میں ان غلطیوں کا اعادہ نہ ہو۔