انگلینڈ کرکٹ ٹیم کے سابق کپتان کیون پیٹرسن کی بالی ووڈ میں انٹری؟ تصویر وائرل

انگلینڈ(قدرت روزنامہ)انگلینڈ کرکٹ ٹیم کے سابق کپتان کیون پیٹرسن نے ممبئی میں سڑک کنارے چائے بناتے ہوئے اپنی تصویر شیئر کرکے بھارتی مداحوں کو دلچسپ انداز میں بتایا کہ وہ بالی ووڈ میں قدم رکھنے جا رہے ہیں۔ ان کی اس مزاحیہ پوسٹ پر سوشل میڈیا صارفین نے بھی خوب تبصرے کیے۔
کیون پیٹرسن ان دنوں اپنے یوٹیوب چینل کے لیے مواد تیار کرنے کی غرض سے ممبئی میں موجود ہیں۔ انہوں نے جمعہ 20 نومبر کو سوشل میڈیا پلیٹ فارم ایکس پر ایک تصویر پوسٹ کی، جس میں وہ ایک چائے کے اسٹال پر چائے بناتے دکھائی دے رہے ہیں۔ تصویر کے ساتھ انہوں نے مذاقاً لکھا کہ مداح انہیں بالی ووڈ میں آنے کا مشورہ دے رہے تھے، اس لیے انہوں نے ان کی بات سن لی ہے اور آج وہ اپنے فلمی کیریئر کا آغاز کررہے ہیں۔
اس پوسٹ کے بعد بھارتی صارفین نے بھی ان کے مذاق میں بھرپور حصہ لیا۔ ایک صارف نے کہا کہ انہیں فوراً آدھار کارڈ بنوا لینا چاہیے، جو بھارت میں شناختی دستاویز کے طور پر استعمال ہوتا ہے۔ ایک اور صارف نے سوال کیا کہ کیا وہ کوچنگ چھوڑ کر اداکاری کی دنیا میں قدم رکھنے والے ہیں؟ بعض مداحوں نے تصویر میں ان کے انداز اور شخصیت کی تعریف بھی کی۔ ایک صارف نے لکھا کہ وہ اس روپ میں بہت اچھے لگ رہے ہیں، جبکہ ایک اور نے انہیں انگریز سے زیادہ بھارتی قرار دیا۔
کیون پیٹرسن کا بھارت سے تعلق کافی پرانا اور مضبوط ہے۔ وہ اکثر سوشل میڈیا پر بھارتی شہروں، کھانوں اور روزمرہ زندگی سے متعلق تصاویر اور ویڈیوز شیئر کرتے رہتے ہیں، جنہیں مقامی مداحوں کی جانب سے خاصی پذیرائی ملتی ہے۔
سابق انگلش بلے باز نے کرکٹ تبصروں، مختلف تقریبات میں شرکت اور ڈیجیٹل مواد کے ذریعے بھی بھارت کے کرکٹ اور آن لائن تفریحی حلقوں میں اپنی نمایاں جگہ بنائی ہے۔ ممبئی سے ان کی تازہ پوسٹ بھی بھارتی ثقافت اور وہاں کے مداحوں کے ساتھ ان کی بے تکلفی کی ایک مثال ہے۔
تاہم کیون پیٹرسن کی جانب سے بالی ووڈ میں کام شروع کرنے کا اعلان محض ایک مزاحیہ جملہ تھا۔ فی الحال ان کے کسی فلمی منصوبے میں شامل ہونے کی اطلاع سامنے نہیں آئی۔
