فی کس ڈیڑھ لاکھ حج سپورٹ فنڈ کی رقوم واپسی کا عمل شروع کر دیا گیا ہے ،مفتی عبدالشکور

اسلام آباد(قدرت روزنامہ) وفاقی وزیر مذہبی امور مفتی عبدالشکور نے کہاہے کہ سرکاری سکیم کے حجاج کرام کی وطن واپسی مکمل ہونے کے ساتھ ہی فی کس ڈیڑھ لاکھ روپے حج سپورٹ فنڈ کی رقوم واپس کرنے کا عمل شروع کر دیا گیا ہے ،کامیاب حج اپریشن پر وزارت کے تمام افسران کو مبارکباد پیش کرتا ہوں . اسلام آباد میں پریس کانفرنس سے خطاب کرتے ہوئے وفاقی وزیر نے کہاکہ حج سپورٹ فنڈ کی مد میں سرکاری حجاج کرام کو 5 ارب، 10 کروڑ، 73 لاکھ 50 ہزار روپے کی تقسیم کا عمل 17اگست تا 31 اگست مکمل کر لیا جائے گا .

34 ہزار 49سرکاری حجاج (بشمول 2 ہزار اضافی حج کوٹہ) کو رقوم کی واپسی کی اطلاع بذریعہ موبائل ایس ایم ایس کی جائے گی . وزیر مذہبی امور مفتی عبدالشکور نے سرکاری حجاج کرام کو ہدایت کی ہے کہ مقررہ وقت کے اندر اپنے متعلقہ بینک سے رابطہ کریں .
بینک کے عملہ کو موبائل میسج ، اصل شناختی کارڈ، اصل پاسپورٹ اور اصل بینک رسید دکھانا لازم ہو گا . نامزد بینک حجاج کرام کی رقوم کی واپسی انکی سہولت کے مطابق بذریعہ بینک اکاونٹ، پے آرڈر یا نقد کی صورت میں ادا کرنے کے پابند ہیں .

اس سے قبل انہوں نے کہا کہ مختصر وقت میں حج 2022 کے اعلیٰ انتظامات کو ممکن بنایا . اس سال حج کی نمایاں خصوصیات میں اسلام آباد ایئرپورٹ سے 15000 سے زائد سرکاری حجاج کو "روٹ ٹو مکہ" کی سہولت ، مکہ مکرمہ میں 10 سال کے بعد حرم کے قریب ترین رہائش گاہیں ، تمام حجاج کو حرم ٹرانسپورٹ 24/7 بلا تعطل فراہمی، مدینہ منورہ میں تمام حجاج کو مرکزیہ میں 4 اور 5 سٹار ہوٹلوں کی فراہمی شامل ہے .
نیز منیٰ کے مکاتب مجموعے کی شکل میں اور جمرات سے قریب لیے . میدانِ عرفات میں پاکستانی مکاتب مسجد نمرہ اور جبل رحمت کے نزدیک اور مجموعے کی شکل میں حاصل کئے . حجاج کو قریبا 40 دن قیام کے دوران بہترین پاکستانی معیار کے تین وقت کھانے کی فراہمی کو یقینی بنایا گیا . مکہ سے مدینہ اورمدینہ سے مکہ قریبا 450 کلومیٹر سفر کیلئے جدید ماڈل کی لگڑری بسوں کا انتظام کیا گیا . مدینہ منورہ میں معاونین حج کی مدد سے ریاض الجنہ کی زیارت اور وطن واپسی کیلئے سعودی عرب میں سٹی چیک ان کے ذریعے حجاج کی رہائشگاہوں میں 24 گھنٹے پہلے انکے سامان کی بکنگ اور بورڈنگ پاسز کا اجرائ عمل میں لایا گیا ہے .