چینی کی اُونچی اڑان ، پاکستان میں اس وقت چینی کا کتنا سٹاک ہے ؟ تفصیلات سامنے آ گئیں

لاہور (قدرت روزنامہ)ترجمان حکومت پنجاب حسان خاور نے بیان جاری کرتے ہوئے کہاہے کہ مارکیٹ میں چینی کا وافر سٹاک موجود ہے اور سپلائی کی کوئی قلت نہیں ہے۔تفصیلات کے مطابق حسان خاور کا کہناتھا کہ مارکیٹ میں درآمد شدہ چینی آج بھی 90 روپے فی کلو دستیاب ہے ، چینی کا 30 ہزار ٹن سٹاک حکومت کے پاس موجود ہے ، 23 ہزار ٹن چینی کراچی سے آ رہی ہے ، 34 ہزار ٹن چینی لنگر انداز بحری جہازوں میں موجود ہے ، چینی کا پرائیویٹ سٹاک بھی 40 سے 50 ہزار ٹن دستیاب ہے ، کرشنگ سیزن شروع ہونے تک چینی کا سٹاک ضروریات کیلئے کافی ہے ۔
انہوں نے کہا کہ عوام سے درخواست ہے کہ درآمد شدہ چینی استعمال کریں ، وفاق اور حکومت پنجاب چینی پر پانچ ارب روپے کی سبسڈی دے رہی ہے ، چینی کی گراں فروشی پر حکومت سخت ایکشن لے رہی ہے ، پہلے گراں فروشی پر حکومت شوگر ملز کا سٹاک اٹھا لیتی تھی ، اب یہ معاملہ عدالت زیر سماعت ہونے کے باعث ایسا نہیں کیا جا سکتا ، حکومت چینی کے ڈیلرز اور بروکرز کے خلاف بھر پور ایکشن لے رہی ہے ، حکومت چینی کے ڈیلرز اور بروکرز کے خلاف بھی بھر پور ایکشن لے رہی ہے ، ملزمالکان بھی گراں فروشی میں ملوث ہوئے تو بلا تفریق کارروائی کی جائے گی ۔
ان کا کہناتھا کہ کچھ شوگرملز کو ریکارڈ مہیا نہ کرنے پر سیل بھی کیا جا چکاہے ، اپوزیشن اب چینی کے معاملے پر سیاست کر رہی ہے ، سندھ کا کرشنگ سیز اکتوبر یا نومبر کے آغاز میں شروع ہو جاتاہے ۔