آج جمعہ 20 جون 2025کو پاکستانی روپے کے مقابلے میں سعودی ریال کا ریٹ
کراچی(قدرت روزنامہ)جمعہ کے روز اوپن مارکیٹ میں سعودی ریال کی خریداری کی قیمت 75اعشاریہ 59 روپے ریکارڈ کی گئی، جو کہ دو پیسے کے اضافے کے بعد طے ہوئی۔ اسی کے ساتھ سعودی ریال کی فروخت کی قیمت بھی بڑھ کر 76اعشاریہ 14 روپے ہو گئی، جو سعودی کرنسی کی قدر میں اضافہ ظاہر کرتی ہے۔
سعودی ریال کا پاکستانی روپے کے ساتھ تبادلہ نرخ انٹرنیٹ پر سب سے زیادہ تلاش کیے جانے والے موضوعات میں شامل ہے کیونکہ سعودی عرب میں لاکھوں پاکستانی مقیم ہیں جو ہر ماہ اربوں ڈالر کی ترسیلات زر پاکستان بھیجتے ہیں اور ملکی زرِمبادلہ کے ذخائر کو مضبوط بنانے میں اہم کردار ادا کرتے ہیں۔
موجودہ نرخ کے مطابق اگر کوئی شخص 500 سعودی ریال تبدیل کرواتا ہے تو اسے پاکستانی اوپن مارکیٹ میں تقریباً 37ہزار785 روپے حاصل ہوں گے۔
مالی سال 2024-25 کے گیارہ مہینوں (جولائی 2024 سے مئی 2025) کے دوران بیرون ملک پاکستانیوں کی طرف سے بھیجی گئی ترسیلات زر میں 28اعشاریہ 8 فیصد کا نمایاں اضافہ دیکھنے میں آیا۔
اس عرصے کے دوران مجموعی ترسیلات تقریباً 35 ارب امریکی ڈالر تک پہنچ گئیں۔ صرف مئی 2025 میں موصول ہونے والی ترسیلات 3اعشاریہ 69 ارب ڈالر ریکارڈ کی گئیں، جو ماہانہ بنیاد پر بھی ایک بڑی پیش رفت ہے۔
اسٹیٹ بینک آف پاکستان نے بدھ کے روز رپورٹ میں بتایا کہ جولائی تا مئی کے عرصے میں ترسیلات زر کا مجموعی حجم 34اعشاریہ 9 ارب ڈالر رہا جو پچھلے مالی سال کے اسی عرصے میں موصول ہونے والے 27اعشاریہ 1 ارب ڈالر کے مقابلے میں 28اعشاریہ 8 فیصد زیادہ ہے۔
مئی 2025 میں سعودی عرب میں مقیم پاکستانیوں نے سب سے زیادہ 913اعشاریہ 3 ملین ڈالر کی ترسیلات پاکستان بھیجیں جبکہ متحدہ عرب امارات دوسرے نمبر پر رہا جہاں سے 754اعشاریہ 2 ملین ڈالر پاکستان بھجوائے گئے۔
