سعودی حکام نے دمام شہر کے لیے ہنگامی وارننگ جاری کردی
دمام (قدرت روزنامہ) سعودی عرب کے شہر دمام کے لیے سول ڈیفنس کی جانب سے ممکنہ خطرے کے پیشِ نظر ہنگامی وارننگ اور الرٹ جاری کردیا گیا۔ عرب میڈیا کے مطابق سعودی جنرل ڈائریکٹوریٹ آف سول ڈیفنس نے اپنے نیشنل ارلی وارننگ پلیٹ فارم کے ذریعے دمام اور ارد گرد کے علاقوں کی آبادی کے موبائل فونز پر سائرن پر مبنی صوتی و تحریری الرٹ بھیجا، الرٹ کا مقصد شہریوں کو احتیاطاً کھلی جگہوں سے ہٹ کر فوری طور پر محفوظ احاطوں یا عمارتوں کے اندر منتقل ہونے کی ہدایت کرنا تھا۔
سعودی دفاعی و سکیورٹی ذرائع نے بتایا کہ وارننگ کا بنیادی سبب دمام اور مشرقی صوبے کی فضائی حدود کے قریب ممکنہ غیر ملکی ڈرون یا میزائل کی نشاندہی تھی، سعودی ایئر ڈیفنس سسٹمز نے ممکنہ خطرے کو آبادی تک پہنچنے سے پہلے ہی فضائی حدود کی حدود میں مؤثر طریقے سے ناکام یا بے اثر کر دیا، جس کے بعد معمول کے حالات بحال کردیئے گئے۔
مشرقی صوبے میں واقع تیل اور گیس کی اہم تنصیبات خاص طور پر آرامکو کی قریبی سائٹس اور بین الاقوامی ایئرپورٹ کے حوالے سے جاری کردہ بیانات میں بتایا گیا ہے کہ تمام حساس، دفاعی اور معاشی تنصیبات بالکل محفوظ ہیں، کسی بھی قسم کے جانی یا مالی نقصان کی اطلاع نہیں ملی اور دمام میں ٹریفک و دیگر زندگی کے معمولات معمول کے مطابق رواں دواں ہیں۔
معلوم ہوا ہے کہ دمام میں الرٹ جاری ہونے کے عین اسی وقت پڑوسی ملک بحرین کے دارالحکومت منامہ میں بھی سنسنی خیز صورتحال پیدا ہو گئی، منامہ میں خطرے کے سائرن بج اٹھے جس سے شہریوں میں خوف و ہراس پھیل گیا، سائرن بجنے کے فوراً بعد منامہ کی فضا میں ایک شدید دھماکے کی آواز سنی گئی، جس کے بعد سکیورٹی اداروں کو الرٹ کر دیا گیا۔ خیال رہے کہ دمام اور منامہ میں سائرن اور الرٹ کی یہ تازہ ترین لہر امریکہ اور ایران کے درمیان جاری باقاعدہ جنگ کے تناظر میں سامنے آئی ہے، امریکہ اور ایران کے درمیان شدت اختیار کرتی ہوئی جنگ کے دوران خلیجی ممالک پر ایران کی جانب سے روزانہ کی بنیاد پر حملے اور جوابی اقدامات کا سلسلہ جاری ہے، تجارتی بحری راستوں کی بندش اور فوجی تنصیبات پر حملوں کے باعث پورے خلیجی خطے کی سکیورٹی کو اعلیٰ ترین الرٹ پر رکھا گیا ہے۔
