گند اس لیے ڈلتا ہے کیونکہ ہم ڈالتے ہیں، وزیرِتعلیم پنجاب کی اس منطق پر جاوید چوہدری کا شدید طنز
کیا زبردست فارمولہ دیا ہے رانا صاحب! یہ بھی بتا دیتے کہ بندہ اس لیے گیلا ہوتا ہے کیونکہ وہ گیلا ہوجاتا ہے، بندے کو ٹُھڈا اس لیے لگتا ہے کیونکہ ٹُھڈا لگ جاتا ہے، کمال منطق ہے، سلام ہے بھائی! تجزیہ کار کی طنزیہ گفتگو
لاہور(قدرت روزنامہ)صوبائی وزیرِ تعلیم پنجاب رانا سکندر حیات کی جانب سے سکول کے بچوں کو گندگی اور صفائی سے متعلق دی جانے والی منطق پر معروف صحافی، کالم نگار اور تجزیہ کار جاوید چوہدری نے شدید طنز کرتے ہوئے ان کے بیان کو شدید تنقید کا نشانہ بنادیا۔
سماء ٹی وی پر اپنے شو کے دوران جاوید چوہدری نے وزیرِ تعلیم کے بیان کا حوالہ دیتے ہوئے کہا کہ رانا سکندر حیات نے ایک سکول کے دورے کے دوران بچوں کو صفائی کا درس دیتے ہوئے عجیب منطق پیش کی کہ ’آپ کو پتہ ہے گند کیوں ڈلتا ہے؟ کیونکہ ہم گند ڈالتے ہیں، اگر ہم گند نہ ڈالیں تو گند نہیں ڈلے گا‘۔
“کچرا نہیں ڈالیں گے تو کچرا نہیں ہوگا!“
وزیرِ تعلیم کے فارمولے پر جاوید چوہدری کا طنزیہ جواب—منطق ایسی کہ ہنسی بھی آئے اور سوال بھی اٹھے۔۔#SamaaTV #Moaqaf #JavedChaudhry #AbdulSattarKhan @JavedChOfficial pic.twitter.com/w9vGpkCoOH— SAMAA TV (@SAMAATV) September 18, 2026
جاوید چوہدری نے طنزیہ انداز اپناتے ہوئے کہا کہ رانا صاحب نے کیا زبردست اور حیران کن فارمولہ پیش کیا ہے جس پر انہیں سلام پیش کرنا چاہیے چونکہ وہ وزیرِ تعلیم ہیں، اس لیے انہیں بچوں کو یہ بھی بتا دینا چاہیے تھا کہ بچے سکول میں اس لیے فیل ہوتے ہیں کیونکہ وہ فیل ہو جاتے ہیں!۔
انہوں نے وزیرِ تعلیم کی منطق کا موازنہ دیگر مضحکہ خیز مثالوں سے کرتے ہوئے کہا کہ اس حساب سے تو انسان اس لیے گیلا ہوتا ہے کیونکہ وہ گیلا ہو جاتا ہے، اور بندے کو ٹھوکر اس لیے لگتی ہے کیونکہ ٹھوکر لگ جاتی ہے، ایسی اعلیٰ منطق اور فلسفے پر وزیرِ تعلیم کو داد ہی دی جا سکتی ہے۔
