نواز شریف کا استقبال، مریم نواز کی زیرِ صدارت اجلاس آج ہو گا

لاہور (قدرت روزنامہ) پاکستان واپسی پر مسلم لیگ ن کے قائد، سابق وزیرِ اعظم نواز شریف کے استقبال کی تیاریوں پر مشاورت کے لیے ن لیگ کا اجلاس آج ہو گا۔لاہور میں مسلم لیگ ن کے ورکرز اجلاس سے سینئر نائب صدر اور چیف آرگنائزر مریم نواز خطاب کریں گی۔
اجلاس سابق رکنِ قومی اسمبلی ملک ریاض کے حلقے میں ہو گا۔دوسری جانب پاکستان مسلم لیگ ن کی قیادت نے فیصلہ کیا ہے کہ وہ اپنا بیانیہ پاکستان کے معاشی احیاء کے حوالے سے تشکیل دے گی اور اسٹیبلشمنٹ مخالف بیانیے سے گریز کیا جائے گا۔
یہ فیصلہ لندن میں پے در پے ہونے والی متعدد ملاقاتوں کے دوران کیا گیا ہے۔ واضح رہے کہ سابق وزیرِ اعظم نواز شریف کی وطن واپسی کے بارے میں 21 اکتوبر کی تاریخ کا اعلان کیا گیا ہے۔