جے یو آئی رہنما نور عالم خان کا مولانا فضل الرحمان کے بیان پر سخت ردعمل

پشاور(قدرت روزنامہ)جمعیت علمائے اسلام (ف) (جے یو آئی ) کے رہنما اور رکن قومی اسمبلی نور عالم خان نے مولانا فضل الرحمان کے حالیہ بیان پر ردعمل دیتے ہوئے کہا ہے کہ شہداء اور ان کے اہل خانہ کے حوالے سے سیاست نہیں ہونی چاہیے، کیونکہ وطن کی خاطر جان قربان کرنے والے افراد کا احترام ہم سب پر لازم ہے۔ اپنے بیان میں نور عالم خان نے کہا کہ “کوئی بھی شخص تنخواہ یا مالی مفاد کے لیے اپنے بچوں کو شہید نہیں کرواتا۔
وطن کے دفاع کے لیے جانوں کا نذرانہ پیش کرنے والے ہمارے حقیقی ہیرو ہیں اور ان کی قربانیوں پر سیاست کرنا مناسب نہیں۔” انہوں نے کہا کہ جو لوگ شہداء کے بچوں یا افواج پاکستان پر تنقید کرتے ہیں، انہیں پہلے سرحدوں پر جا کر قربانیوں کی حقیقت کو سمجھنا چاہیے۔
ان کا کہنا تھا کہ ملک کے دفاع کے لیے جان قربان کرنے والوں کے اہل خانہ کے جذبات کا احترام ہر پاکستانی کی ذمہ داری ہے۔
نور عالم خان نے مزید کہا کہ بعض سیاسی عناصر عوام کو گمراہ کرنے کی کوشش کرتے ہیں، جبکہ انتخابات کے دوران یہی لوگ مختلف حلقوں میں حکومت سازی کے لیے حمایت اور سہولتیں حاصل کرنے کی کوشش کرتے نظر آتے ہیں۔

🚨 جے یو آئی رہنما نور عالم خان مولانا فضل الرحمان کے بیان پر بول پڑے

کوئی بھی تنخواہ کے لیے بچوں کو شہید نہیں کرتا، میں شہیدوں پہ سیاست نہیں کرتا، جو شہیدوں کے بچوں پہ تنقید کرتا ہے پہلے وہ باڈر پہ جا کہ اپنے بچوں کو شہید کروائے، پھر وہ اپنی افواج پہ اور ان کے شہیدوں پہ سیاست… pic.twitter.com/ufNezN7BHA

— Shehzad nawaz (@sknawaz478) July 16, 2026

انہوں نے کہا کہ شہداء کے معاملے کو سیاسی مقاصد کے لیے استعمال کرنا قومی مفاد کے خلاف ہے۔ جے یو آئی رہنما نے زور دیتے ہوئے کہا کہ ہمیں ایسی گفتگو یا طرزِ عمل سے گریز کرنا چاہیے جو ملکی اداروں کو کمزور کرے یا قومی یکجہتی کو نقصان پہنچائے۔
ان کا کہنا تھا کہ شہداء کی قربانیاں پوری قوم کا سرمایہ ہیں اور ان کے احترام پر کوئی سمجھوتہ نہیں کیا جا سکتا۔ انہوں نے کہا کہ ملک کی سلامتی، افواج پاکستان اور شہداء کے احترام کے معاملے پر تمام سیاسی جماعتوں کو ذمہ داری کا مظاہرہ کرنا چاہیے اور ایسے بیانات سے اجتناب کرنا چاہیے جو قومی اتحاد کو متاثر کریں۔