اسلام آباد ہائیکورٹ میں عمران خان اور بشریٰ بی بی کی سزا کے خلاف اپیلوں پر سماعت ملتوی کرنے کے لیے متفرق درخواستیں دائر

اسلام آباد(قدرت روزنامہ)اسلام آباد ہائیکورٹ میں عمران خان اور بشریٰ بی بی کی سزا کے خلاف دائر اپیلوں پر سماعت ملتوی کرنے کے لیے ایک متفرق درخواست دائر کر دی گئی ہے۔
اسلام آباد ہائیکورٹ میں دائر کی گئی متفرق درخواست کے متن میں مؤقف اختیار کیا گیا ہے کہ اعلیٰ عدلیہ کے واضح احکامات اور آرڈر کے باوجود وکلا کو اپنے مؤکلین سے قانونی ہدایات لینے کی اجازت نہیں دی جا رہی۔
درخواست گزاروں نے دعویٰ کیا ہے کہ جیل انتظامیہ کی جانب سے بانی پی ٹی آئی اور بشریٰ بی بی سے ملاقات کے لیے ضروری سہولیات فراہم نہیں کی جا رہیں۔
مزید برآں بانی پی ٹی آئی کی تینوں بہنیں بھی اس وقت حراست میں ہیں، جس کے باعث ان سے بھی کسی قسم کی قانونی رہنمائی یا ہدایات حاصل کرنا ناممکن ہو چکا ہے۔
وفاقی آئینی عدالت میں زیرِ التوا معاملہ
درخواست میں ایک اہم قانونی نقطہ اٹھاتے ہوئے عدالت کو بتایا گیا ہے کہ بشریٰ بی بی کی سزا معطلی کو غیر مؤثر قرار دینے کے فیصلے کے خلاف اپیل اس وقت وفاقی آئینی عدالت میں زیرِ التوا ہے۔
قانونی ٹیم نے استدعا کی ہے کہ جب تک وفاقی آئینی عدالت کی جانب سے اس اپیل پر کوئی حتمی فیصلہ سامنے نہیں آ جاتا، تب تک اسلام آباد ہائیکورٹ میں مرکزی اپیلوں کو سماعت کے لیے مقرر نہ کیا جائے اور موجودہ کارروائی کو ملتوی رکھا جائے۔
قانونی تنازعات اور قید کے چیلنجز
بانی پی ٹی آئی اور ان کی اہلیہ بشریٰ بی بی کو مختلف مقدمات میں سزاؤں کا سامنا ہے، جن کے خلاف ان کی قانونی ٹیم نے اسلام آباد ہائیکورٹ سے رجوع کر رکھا ہے۔وکلا کا موقف رہا ہے کہ مناسب قانونی مشاورت کے بغیر اپیلوں پر موثر پیروکاری ممکن نہیں۔