محسن نقوی کی منصورہ میں امیر جماعت اسلامی سے ملاقات، مشاورت جاری رکھنے پر اتفاق
ملک کو درپیش چیلنجز سے نمٹنے کے لیے سب کو اپنا مؤثر کردار ادا کرنا ہے؛ وفاقی وزیر داخلہ کی گفتگو

لاہور(قدرت روزنامہ)وفاقی وزیر داخلہ محسن نقوی نے لاہور میں منصورہ کا دورہ کیا اور امیر جماعت اسلامی پاکستان حافظ نعیم الرحمان سے ملاقات کی، جس میں ملکی صورتحال اور امن و امان کے اقدامات پر تفصیلی تبادلہ خیال کیا گیا، ملاقات کے دوران دونوں رہنماؤں کے درمیان موجودہ سیاسی و سیکیورٹی منظرنامے پر غور کیا گیا اور آئندہ بھی مشاورت کا سلسلہ جاری رکھنے پر اتفاق کیا گیا۔
میڈیا رپورٹس کے مطابق وفاقی وزیر داخلہ محسن نقوی منصورہ پہنچے جہاں انہوں نے امیر جماعت اسلامی حافظ نعیم الرحمان سے ملاقات کی، اس موقع پر ملک کی مجموعی صورتحال اور امن و امان کے حوالے سے کیے جانے والے اقدامات پر تفصیلی گفتگو کی گئی، ملاقات میں ملکی استحکام، داخلی سیکیورٹی اور درپیش چیلنجز کے سلسلے میں مختلف پہلوؤں پر بات چیت ہوئی، دونوں فریقین نے باہمی مشاورت کے عمل کو مستقبل میں بھی برقرار رکھنے پر اتفاق رائے ظاہر کیا تاکہ اہم قومی معاملات پر رابطے مؤثر رہ سکیں۔
ملاقات کے موقع پر وفاقی وزیر داخلہ محسن نقوی نے کہا کہ ملک کو درپیش چیلنجز سے نمٹنے کے لیے سب کو اپنا مؤثر کردار ادا کرنا ہے، موجودہ حالات میں مشترکہ کاوشوں اور ذمہ دارانہ طرزِ عمل کے ذریعے ہی چیلنجز کا مؤثر مقابلہ کیا جا سکتا ہے۔
اس دوران امیر جماعت اسلامی حافظ نعیم الرحمان نے اس موقع پر زور دیا کہ عوام کو ریلیف کی فراہمی سب سے اہم ترجیح ہونی چاہیے، مہنگائی اور معاشی دباؤ کے شکار شہریوں کو ریلیف فراہم کرنا ناگزیر ہے اور اسی کو سرفہرست رکھا جانا چاہیے، جبکہ ملاقات کے اختتام پر دونوں رہنماؤں نے آئندہ بھی مشاورت جاری رکھنے پر اتفاق کیا۔
