اشیائے خورونوش: ایک ہفتے کے دوران کیا مہنگا اور کیا سستا ہوا؟

اسلام آباد (قدرت روزنامہ)ملک میں ایک ہفتے کے دوران مہنگائی میں 0.01 فیصد اضافہ ہوا ہے۔
ادارہ شماریات کی جانب سے جاری کردہ ہفتہ وار مہنگائی کے اعداد و شمار کے مطابق مہنگائی کی مجموعی شرح 14.36 فیصد ریکارڈ کی گئی۔
اعداد و شمار کے مطابق ایک ہفتے میں 15 اشیا کی قیمتوں میں اضافہ اور 14 اشیا کی قیمتوں میں کمی ہوئی جبکہ 22 کی قیمتیں پہلے جیسی رہیں۔
ٹماٹر کی فی کلو قیمت میں7 روپے 40 پیسے کا اضافہ ہوا۔ زندہ مرغی کی فی کلو قیمت 16 روپے 7 پیسے بڑھی۔
دال چنا 9 روپے 26 پیسے، لہسن 12 روپے فی کلو، گائے کا گوشت فی کلو 11 روپے تک مہنگا ہوا۔
ادارہ شماریات کے مطابق ایک ہفتے میں بکرے کے گوشت کی فی کلو قیمت میں 14 روپے تک اضافہ ہوا جبکہ تازہ دودھ، دہی، گھی، ٹوٹا باسمتی چاول کی قیمتیں بھی بڑھیں۔
ایک ہفتے میں بجلی فی یونٹ 26 پیسے مہنگی ہوئی۔
ایک ہفتے کے دوران سستی ہونے والی اشیا میں کیلا فی درجن 8 روپے تک سستا ہوا، دال ماش بھی 8 روپے فی کلو تک سستی ہوئی۔
آٹے کا 20 کلو تھیلا 17 روپے تک سستا ہوا جبکہ انڈے کی فی درجن قیمت میں 3 روپے تک کمی ہوئی۔
آلو کی فی کلو قیمت میں 82 پیسے کی کمی ہوئی جبکہ ایک ہفتے میں دال مونگ، مسور، پیاز، خوردنی تیل اور چینی بھی سستی ہوئی۔