میرا دل چاہتا ہے کہ آپ چاند مانگو تو آپ کو چاند ملے، مریم نواز شریف

ساہیوال(قدرت روزنامہ) وزیر اعلیٰ پنجاب مریم نواز شریف نے کہا ہے کہ ان کی دعا ہے کہ پورا پنجاب اور پاکستان ترقی کرے اور بچے زندگی کے ہر شعبے میں نمایاں کامیابیاں حاصل کریں۔ یونیورسٹی آف ساہیوال میں لیپ ٹاپ تقسیم کی تقریب سے خطاب کرتے ہوئے مریم نواز شریف نے بچوں کے لیے نیک خواہشات کا اظہار کرتے ہوئے کہا کہ اللہ تعالیٰ کرے کہ پورا پنجاب ترقی کرے، پورا پاکستان ترقی کرے اور ان کے بچے بھی خوب ترقی کریں۔
انہوں نے کہا کہ ان کی خواہش ہے کہ بچوں میں سے کوئی مستقبل میں چیف منسٹر بنے، کوئی وزیر، کوئی ایم پی اے اور کوئی ایم این اے بنے۔ بچے پولیس کمشنر، آر پی او، ڈی پی او، کمشنر، ڈپٹی کمشنر اور اسسٹنٹ کمشنر جیسے اہم عہدوں تک پہنچیں۔
مریم نواز شریف کا کہنا تھا کہ ان کا دل چاہتا ہے کہ بچے چاند مانگیں تو انہیں چاند ملے، یعنی انہیں ترقی کے بھرپور مواقع میسر آئیں اور وہ اپنے خواب پورے کر سکیں۔

میرا دل کرتا ہے آپ چاند مانگو میں چاند لا کر دے دوں، آپ میں سے چیف منسٹر بھی بنے، ایم این ایز بھی بنے، ایم پی ایز بھی بنے، آپ سب خوب ترقی کریں، وزیراعلیٰ مریم نواز

#MaryamNawaz #PunjabiNews #cmpunjab #punjabpost https://t.co/NeOPCI7H6g

— Punjab Post (@PunjabPostpk) October 16, 2026

وزیراعلیٰ پنجاب کا مزید کہنا کہ بجٹ کی مشکلات اور مالی وسائل کی کمی کے باوجود پنجاب حکومت نوجوانوں کے لیے ایک لاکھ الیکٹرک بائیکس فراہم کرنے جا رہی ہے۔ مریم نواز شریف کا کہنا تھا کہ جب انہوں نے درخواستیں طلب کیں تو اس کی ایک وجہ بجٹ کی مشکلات تھیں، کیونکہ ان کے پاس مالی وسائل محدود ہیں۔ انہوں نے کہا کہ اس سال وفاق نے پنجاب سے پیسے لے لیے، تاہم انہوں نے یہ رقم دے دی۔
اب وہ انکار کیسے کر سکتی ہیں؟ وزیراعلیٰ پنجاب نے ایک لاکھ بائیکس کے لیے درخواستوں اور رجسٹریشنز کا حوالہ دیتے ہوئے کہا کہ جب انہوں نے ایک لاکھ بائیکس کے لیے درخواستیں طلب کیں تو بڑی تعداد میں لوگوں نے رجسٹریشن کروائی۔ پنجاب کا خزانہ عوام کا ہے اور انہوں نے صوبے کے خزانے کے دروازے اپنے بیٹوں اور بیٹیوں کے لیے کھول دیے ہیں۔ ان کا کہنا تھا کہ رواں سال پہلی مرتبہ پنجاب حکومت ایک لاکھ الیکٹرک بائیکس فراہم کرنے جا رہی ہے۔
اس اقدام کا مقصد نوجوانوں کو سفری سہولت فراہم کرنا اور ان کے لیے مواقع پیدا کرنا ہے۔ وزیراعلیٰ پنجاب نے واضح کیا کہ مالی مشکلات کے باوجود نوجوانوں کے لیے اقدامات جاری رکھے جائیں گے اور صوبائی وسائل عوام کی فلاح و بہبود پر خرچ کیے جائیں گے۔ مریم نواز کا مزید کہنا تھا کہ بچوں سے کیا گیا وعدہ پورا کرنے کے لیے وہ بارش کے باعث ہیلی کاپٹر کی پرواز منسوخ ہونے کے باوجود سڑک کے راستے روانہ ہوئیں، کیونکہ وہ نہیں چاہتی تھیں کہ بچے ان کا انتظار کرتے رہ جائیں۔
وزیر اعلیٰ پنجاب کا کہنا تھا کہ انہوں نے ہیلی کاپٹر کے ذریعے آنا تھا، لیکن صبح لاہور میں بارش کے باعث پرواز منسوخ ہوگئی، جس پر انہوں نے بذریعہ سڑک سفر کرنے کا فیصلہ کیا۔ ان کا کہنا تھا کہ انہوں نے سوچا کہ ایسا نہیں ہوسکتا کہ بچے ان کا انتظار کریں اور وہ نہ پہنچیں۔