ایزی پیسہ کا صارفین کے اکاؤنٹس اور مالی لین دین کے تحفظ کے لیے جدید سیکیورٹی اقدامات پر زور

اسلام آباد(قدرت روزنامہ)اسٹیٹ بینک آف پاکستان (ایس بی پی) کی نگرانی میں کام کرنے والے ڈیجیٹل بینک ایزی پیسہ نے صارفین کے اکاؤنٹس، ذاتی معلومات اور مالی لین دین کے تحفظ کو اپنی اولین ترجیحات میں شامل قرار دیتے ہوئے کہا ہے کہ صارفین کو فراڈ اور دیگر مالی خطرات سے محفوظ رکھنے کے لیے جامع سیکیورٹی نظام قائم کیا گیا ہے۔
ایزی پیسہ کے مطابق ادارہ ”ٹرسٹ بائی ڈیزائن“ (Trust by Design) کے اصول پر کام کرتا ہے، جس کے تحت ڈیجیٹل مصنوعات اور خدمات کی تیاری کے ابتدائی مراحل ہی سے سیکیورٹی، رازداری اور صارفین کے تحفظ کو یقینی بنانے کے اقدامات شامل کیے جاتے ہیں۔
بینک نے محفوظ اور آسان ڈیجیٹل بینکاری کے لیے متعدد جدید سیکیورٹی اقدامات متعارف کرائے ہیں، جن میں ون ٹائم پاس ورڈ (او ٹی پی)، نادرا کے ڈیٹا بیس سے منسلک بائیومیٹرک تصدیق، لائیونیس ڈیٹیکشن ٹیکنالوجی اور صارفین کی شناخت کی تصدیق کے لیے بہتر طریقہ کار شامل ہیں۔
ادارے کا کہنا ہے کہ ان اقدامات کے ذریعے صارفین کی شناخت کی تصدیق، اکاؤنٹس تک غیر مجاز رسائی کی روک تھام اور حساس مالی معلومات کے تحفظ کو مزید مضبوط بنایا گیا ہے۔
مشکوک سرگرمیوں کی مسلسل نگرانی
ایزی پیسہ کے مطابق ممکنہ مالی فراڈ کی بروقت نشاندہی اور صارفین کو خطرات سے آگاہ کرنے کے لیے مشکوک سرگرمیوں کی مسلسل نگرانی کی جاتی ہے۔
اس نظام کے تحت لاگ اِن کی ناکام کوششوں، نئے یا غیر مانوس آلات سے اکاؤنٹس تک رسائی، اکاؤنٹس یا سم کارڈز سے متعلق تبدیلیوں، غیر معمولی مقامات سے اکاؤنٹ استعمال کرنے اور مشکوک مالی لین دین پر نظر رکھی جاتی ہے۔
بینک کے مطابق ان نگرانی کے نظاموں اور بروقت انتباہات کا مقصد صارفین کو فراڈ کے نئے طریقوں سے آگاہ رکھنا اور انہیں اپنے اکاؤنٹس محفوظ بنانے کے لیے ضروری اقدامات کرنے میں مدد فراہم کرنا ہے۔
صارفین کی ذاتی معلومات اور ڈیٹا کی رازداری پر توجہ
ایزی پیسہ نے مالی معلومات کی حساسیت پر زور دیتے ہوئے کہا کہ صارفین کے ڈیٹا کی رازداری برقرار رکھنا اور ان کی معلومات کا ذمہ دارانہ استعمال یقینی بنانا ادارے کی اہم ترجیحات میں شامل ہے۔
بینک کے مطابق صارفین کے مفادات کا تحفظ متعلقہ ریگولیٹری اداروں کے ساتھ تعاون، نافذ العمل قوانین کی پابندی، مؤثر رسک مینجمنٹ اور سخت گورننس معیارات کے ذریعے کیا جاتا ہے۔
ادارے نے مزید بتایا کہ صارفین کی شناخت اور ان کی معلومات کی تصدیق کے لیے کے وائی سی (Know Your Customer) کے طریقہ کار کو بہتر بنایا گیا ہے، جبکہ کاروباری اداروں کی جانچ پڑتال کے لیے کے وائی بی (Know Your Business) کے عمل کو بھی مضبوط کیا گیا ہے۔
جدید ٹیکنالوجی اور فراڈ کی روک تھام میں مزید سرمایہ کاری کا عزم
ایزی پیسہ نے ڈیجیٹل بینکاری کے شعبے میں جدت، جدید سیکیورٹی نظام، فراڈ کی روک تھام اور صارفین کے تحفظ کے لیے مسلسل سرمایہ کاری جاری رکھنے کے عزم کا اظہار کیا ہے۔
بینک کے مطابق ان اقدامات کا مقصد پاکستان میں ڈیجیٹل بینکاری استعمال کرنے والے لاکھوں صارفین کو محفوظ، قابلِ اعتماد اور پائیدار مالیاتی خدمات فراہم کرنا ہے، تاکہ ڈیجیٹل لین دین پر اعتماد کو مزید فروغ دیا جا سکے۔