موجودہ حکومت مئی تک بھی نہیں چل سکتی، فواد چوہدری

اسلام آباد (قدرت روزنامہ)سابق رہنما پاکستان تحریک انصاف (پی ٹی آئی) فواد چوہدری نے کہا کہ موجودہ حکومت کو مودی سرکار اور عیان علی کے علاوہ کوئی نہیں مانتا، موجودہ حکومت مئی تک بھی نہیں چل سکتی۔
کمرہ عدالت میں صحافیوں سے غیررسمی گفتگو کرتے ہوئے فواد چوہدری نے کہا کہ حکومت نے سعودی عرب کے سفیر سے کال پر بات کرنے کا خود کہہ کر انتظام کیا، اور یورپی یونین کے کسی ملک نے مبارکباد نہیں دی۔
انہوں نے کہا کہ موجودہ حکومت کو ہٹانے میں خیبرپختونخوا کا کردار اہم ہوگا، آصف علی زرداری کو خیبرپختونخوا سے ایک ووٹ بھی نہیں ملا۔ مولانا فضل الرحمان نے فیصلہ کرلیا تو پورا خیبرپختونخوا حکومت کے خلاف ہوجائے گا۔
فواد چوہدری کا مزید کہنا تھا کہ مولانا فضل الرحمان نے لانگ مارچ کا فیصلہ کرلیا تو حکومت چلی جائے گی، حکومت کا رہنا مولانا فضل الرحمان کے فیصلے پر ہوگا۔
ان کا کہنا تھا کہ خیبرپختونخوا کا سیاسی کردار بہت اہم ہے، خیبرپختونخوا نے پاکستان بنانے میں بھی اہم کردارادا کیا تھا۔انہوں نے وزیر اعظم شہباز شریف پر طنز کرتے ہوئے کہا کہ شہبازشریف کو اپنی 33 فیصد کابینہ کا معلوم ہی نہیں ہے۔