اسلام آباد کے اسکولوں میں شمسی توانائی کا منصوبہ شروع کرنے کا فیصلہ

اسلام آباد(قدرت روزنامہ) وفاقی وزارت تعلیم نے اسلام آباد کے اسکولوں میں شمسی توانائی کا منصوبہ شروع کرنے کا فیصلہ کیا ہے .
ترجمان کے مطابق وفاقی دارالحکومت اسلام آباد کے 100 پرائمری اسکول شمسی توانائی سے چلائے جائیں گے .

100 اسکولوں میں شمسی توانائی کا منصوبہ سال کے آخر تک مکمل ہونے کی اُمید ہے . وزارتِ وفاقی تعلیم نے اگلے 2 ماہ میں 100 پرائمری اسکولوں کو شمسی توانائی پر تبدیل کرنے کے منصوبے کا اعلان کیا ہے .
حکام وزارت تعلیم کا کہنا ہے کہ منصوبے کا مقصد بجلی کی لاگت کو کم کرنے اور پائیداری کو فروغ دینا ہے . یہ اقدام قابل تجدید توانائی کے ذرائع کو استعمال کرنے اور شہر کے کاربن فوٹ پرنٹ کو کم کرنے کی ایک بڑی کوشش کا حصہ ہے . یہ منصوبہ نہ صرف بجلی کی لاگت کو کم کرے گا بلکہ ہمارے اسکولوں کے لیے توانائی کا ایک صاف اور پائیدار ذریعہ بھی فراہم کرے گا .
منصوبے میں منتخب اسکولوں کی چھتوں پر سولر پینلز کی تنصیب شامل ہوگی . شمسی توانائی کا نظام ہر اسکول کی توانائی کی ضروریات کو پورا کرنے کے لیے ڈیزائن کیا جائے گا . اس اقدام سے وزارت کو سالانہ کروڑوں روپے کے بجلی اخراجات کی بچت متوقع ہے . منصوبے سے حاصل ہونے والی بچت تعلیمی سہولیات کو بہتر بنانے کے لیے استعمال کی جائے گی .