ولیمے پر کیوں نہیں بلایا؟ لورالائی میں پڑوسی نے میزبان کا سر پھاڑ دیا، مقدمہ درج

کوئٹہ(قدرت روزنامہ)بلوچستان کے علاقے لورالائی میں ولیمے پر مدعو نہ کئے جانے پر ایک شخص نے اپنے پڑوسی کو زخمی کر دیا۔پولیس کے مطابق حملے کے بعد فرار ہو جانے والے شخص کے خلاف مقدمہ درج کر لیا گیا ۔ لورالائی کے ایس ایچ او انور جلال زئی نے میڈیا کو بتایا کہ واقعہ گزشتہ شام کو محلے کی مسجد میں پیش آیا، جہاں جان گل نے ملک فضل محمد کے سر پر پتھر مار کر زخمی کر دیا اور فرار ہو گیا۔ انہوں نے بتایا ملک فضل محمد کے بھتیجے کی شادی ایک ماہ قبل ہی ہوتئی تھی، جس کے ولیمے میں نہ بلانے پر جان گل ناراض تھا۔زخمی ملک فضل محمد نے پولیس کو بتایا کہ میں مسجد میں وضو کر رہا تھا اس دوران جان گل آیا اور کہا کہ مجھے دعوت ولیمہ میں کیوں نہیں بلایا، جس پر بتایا کہ آپ کے بڑے بھائی کو دعوت دی تھی، سب کو تو نہیں بلا سکتا۔پولیس کے مطابق اس پر جان گل نے میزبان کو طعنے دیے اور تلخ کلامی شروع ہو گئی اور بات ہاتھا پائی تک بڑھ گئی، جس میں فضل محمد کو سر پر چوٹ آئی۔زخمی کی شکایت پر پولیس نے تھانہ سٹی میں ملزم جان گل کے خلاف تعزیرات پاکستان کی دفعہ 337 اے ڈی کے تحت مقدمہ درج کر لیا ہے۔