شاہ رخ خان اپنا گھر چھوڑ کر کرائے کے فلیٹ میں کیوں منتقل ہورہے ہیں؟

اسلام آباد (قدرت روزنامہ)شاہ رخ خان کا ممبئی کا بنگلہ ’منت‘ سیاحوں کی توجہ کا مرکز بن گیا ہے۔ ممبئی میں مشہور باندرا بینڈ اسٹینڈ کے سامنے واقع تاریخی بنگلے میں سیلفی لینے والے سینکڑوں شائقین روزانہ آتے ہیں جس میں شاہ رخ خان اور ان کا خاندان 25 سال سے زیادہ عرصے سے رہائش پذیر ہے۔
لیکن شاہ رخ خان آئندہ کچھ ماہ میں اپنے بنگلے سے نکل کر ایک اور بلڈنگ میں رہیں گے جس کی وجہ محلاتی بنگلے کی شاندار تزئین و آرائش ہے۔
دراصل منت میں تزئین و آرائش کا کام مئی میں شروع ہونے والا ہے جس کے دوران بنگلے کی توسیع بھی کی جائے گی لیکن اس کے لیے شاہ رخ کو عدالت سے اجازت لینی پڑی۔ منت گریڈ III کا ایک ثقافتی ورثہ ہے جس میں کوئی بھی ساختی تبدیلی صرف اجازت حاصل کرنے کے بعد ہی ہو سکتی ہے لیکن اب جب کہ تزئین و آرائش کا کام صرف چند ماہ میں شروع ہونے والا ہے، شاہ رخ خان اپنے خاندان کے ہمراہ نئی رہائشگاہ میں منتقل ہو جائیں گے۔
شاہ رخ خان کا عارضی ٹھکانہ
شاہ رخ، بیوی گوری اور بچوں آرین، سہانا، اور ابرام کے ساتھ باندرا کے قریبی مبمئی کے معروف پالی ہل کے علاقے میں ایک لگژری اپارٹمنٹ عمارت کے 4 فلورز میں منتقل ہو رہے ہیں۔ ایچ ٹی کی ایک رپورٹ کے مطابق شاہ رخ نے یہ منزلیں فلم پروڈیوسر واشو بھگنانی سے لیز پر لی ہیں۔
عمارت کی ان 4 منزلوں پر نہ صرف شاہ رخ خان فیملی بلکہ ان کا سیکیورٹی و دیگر عملہ بھی رہائش پذیر ہوگا جب کہ اس میں کچھ جگہ دفتر کے لیے بھی مختص ہوگی۔گو یہ منت کی طرح وسیع نہیں ہے لیکن پھر بھی شاہ رخ خان کی سیکیورٹی اور دیگر عملے کو اس میں رکھے جانے کے لیے خاصی جگہ ہوگی۔ شاہ رخ ان فلورز کا 24 لاکھ روپے ماہانہ کرایہ ادا کریں گے۔
شاہ رخ اور ان کی ٹیم اپارٹمنٹ کمپلیکس میں ان کے اور ان کے خاندان کے لیے مناسب حفاظت اور پرائیویسی کو یقینی بنانے کے لیے کام کر رہی ہے۔بزنس اسٹینڈرڈ کی ایک رپورٹ میں بتایا گیا ہے کہ اداکار نے عمارت کی پہلی، دوسری، 7ویں اور 8ویں منزل پر 2 ڈوپلیکس اپارٹمنٹ لیز پر لیے ہیں۔ اپارٹمنٹس 3 سال کے لیے لیز پر لیے گئے ہیں۔
یہ واضح نہیں ہے کہ آیا شاہ رخ اور اہل خانہ اس عمارت میں طویل قیام کرنے کا ارادہ رکھتے ہیں لیکن بہرحال منت کی تزئین و آرائش میں 2 سال کا عرصہ تو لگ ہی جائے گا۔