لوچستان کے آسمان پر ظاہر ہونے والے رنگین مناظر فطری موسمیاتی عمل کا نتیجہ ہیں، کسی خطرے یا آفت کا خدشہ نہیں

کوئٹہ (قدرت روزنامہ) بلوچستان کے مختلف شہروں میں آج صبح سورج طلوع ہونے سے قبل آسمان پر ایک غیر معمولی اور دلکش قدرتی مظہر دیکھنے میں آیا، جس نے شہریوں کو حیرت اور مسحوریت میں مبتلا کر دیا۔
صوبائی دارالحکومت کوئٹہ میں آسمان کے مختلف حصوں پر رنگ برنگی شعاعوں، بادلوں کی منفرد ساخت اور روشنی کے حسین امتزاج نے فضا کو سحر انگیز بنا دیا۔ عینی شاہدین کے مطابق صبح سویرے آسمان پر نارنجی، سرخی مائل، نیلے اور ہلکے جامنی رنگوں کی روشنی بادلوں سے ٹکرا کر پھیل گئی، جس نے منظر کو کسی مصور کی تخلیق سے مشابہ بنا دیا۔

شہریوں نے ان خوبصورت مناظر کو موبائل کیمروں میں محفوظ کر لیا، جو دیکھتے ہی دیکھتے سوشل میڈیا پر وائرل ہو گئیں۔
ماحولیاتی ماہرین اور محکمہ موسمیات کے مطابق یہ مظہر ایک قدرتی موسمیاتی عمل ہے جو طلوعِ آفتاب کے وقت سورج کی شعاعوں کے مخصوص زاویے سے بادلوں پر پڑنے کے باعث پیدا ہوتا ہے۔ ماہرین نے واضح کیا کہ اس میں کسی قسم کے خطرے یا آفت کا خدشہ نہیں۔
دوسری جانب، سنجاوی اور توبہ کاکڑی کے علاقوں میں آسمان پر پراسرار سفید لکیریں بھی نمودار ہوئیں، جنہوں نے عوام میں تجسس اور تشویش پیدا کر دی۔ بعد ازاں ماہرین نے وضاحت کی کہ یہ لکیریں ممکنہ طور پر جہازوں کے گزرنے کے بعد بخاراتی نشانات (Contrails) ہیں۔
شہریوں نے اس قدرتی منظر کو فطرت کی خوبصورتی اور امن کی علامت قرار دیتے ہوئے دعا کی کہ بلوچستان کی فضائیں ہمیشہ ایسی ہی روشن، پرامن اور حسین مناظر سے مزین رہیں۔