مرغی کا گوشت مزید مہنگا ، فی کلو قیمت کہاں پہنچ گئی؟جانیے

لاہور(قدرت روزنامہ) مرغی کا گوشت مزید مہنگا ہو گیا، انڈوں کی فی درجن قیمت بھی بڑ ھ گئی۔
نجی ٹی وی چینل ہم نیوز کے مطابق آج مرغی کے گوشت کی قیمت میں پھر 7 روپے کا اضافہ ہو گیا ہے جس کے بعد مرغی کا گوشت 475 روپے کلو ہو گیا، گزشتہ روز گوشت 468 روپے کلو تھا۔ گزشتہ روز گوشت کی قیمت میں سات روپے کی کمی ہوئی تھی۔
زندہ برائلر مرغی کی قیمت میں بھی ایک بار پھر پانچ روپے کا اضافہ ہوا ہے جس کے بعد زندہ برائلر کا تھوک ریٹ 314 روپے کلو جبکہ زندہ برائلر کا پرچون ریٹ 328 روپے کلو ہو گیا ہے۔ گزشتہ روز زندہ مرغی کی قیمت میں پانچ روپے کی کمی ہوئی تھی۔
لاہور انتظامیہ نے سرکاری نرخنامے میں انڈوں کی قیمت میں مزید ایک روپے کا اضافہ کر دیا ہے گزشتہ روز بھی قیمت ایک روپے بڑھی تھی، انڈوں کی فی درجن قیمت 326 روپے ہو گئی ہے۔
ملتان میں برائلر مرغی کا تھوک ریٹ 294 روپے کلو، پرچون ریٹ 308 روپے کلو، برائلر گوشت کا فی کلو ریٹ 446 روپے ہے، انڈوں کی فی درجن قیمت 324 روپے ہے۔
ملک بھر میں مرغی کی قیمتیں مختلف ہیں، گزشتہ روز غوری ٹاؤن اسلام آباد میں مرغی کے گوشت کی قیمت 530 روپے کلو تھی جبکہ ترامڑی اور علی پور کے علاقے میں گوشت 480 روپے میں فروخت ہوتا رہا۔