پنجاب میں ضرورت مند بے گھر افراد کو 3 مرلہ پلاٹ مفت دینے کا اعلان‘ علاقوں کے نام جاری

لاہور (قدرت روزنامہ)وزیراعلیٰ پنجاب مریم نواز نے ضرورت مند بے گھر افراد کو 3 مرلہ پلاٹ مفت دینے کا اعلان کردیا۔ تفصیلات کے مطابق پنجاب حکومت کے اس منصوبے کے تحت پہلے مرحلے میں پنجاب کے 22 اضلاع میں 33 مختلف سکیموں کے تحت 1ہزار 892 پلاٹ فراہم کیے جائیں گے، پہلے مرحلے میں راولپنڈی ڈویژن کے 4 اضلاع میں 5 سکیموں کے تحت 658 پلاٹ دئیے جائیں گے، فیصل آباد ڈویژن کے 5 اضلاع میں 4 سکیموں کے تحت 288 پلاٹ فراہم کیے جائیں گے، لاہور ریجن کے 3 اضلاع میں 5 سکیموں کے تحت 518 پلاٹ دیے جائیں گے، بھکر ریجن کی 7 سکیموں میں 131 پلاٹ مختص کیے گئے ہیں، ملتان ریجن کے 5 اضلاع میں 9 سکیموں کے تحت 270 پلاٹ فراہم کیے جائیں گے، بہاولپور ریجن کی 3 سکیموں میں 27 پلاٹ مختص کیے گئے ہیں۔
وزیراعلیٰ پنجاب مریم نواز نے اس منصوبے پر فوری عملدرآمد کے احکامات جاری کرتے ہوئے کہا کہ پنجاب کے ہر شہری کے پاس اپنا گھر ہونا میرا خواب ہے، نادار اور مستحق افراد کا بھی حکومتی وسائل پر برابر حق ہے، یہ مفت پلاٹ کسی پر احسان نہیں بلکہ حکومت اپنی ذمہ داری پوری کر رہی ہے، یہ اقدام صوبے کے نادار اور بے گھر شہریوں کے لیے ایک بڑا ریلیف ثابت ہو سکتا ہے، جس سے انہیں اپنی چھت کا خواب پورا کرنے کا موقع ملے گا۔
علاوہ ازیں وزیراعلیٰ پنجاب مریم نواز کی زیر صدارت خصوصی اجلاس ہوا جس میں اپنی چھت اپنا گھر پروگرام کے منصوبے پر پیش رفت کا تفصیلی جائزہ لیا گیا، اجلاس میں 3 اور 5 مرلہ ہاؤسنگ سکیموں کا تفصیلی جائزہ لیا گیا، اس موقع پر وزیراعلیٰ پنجاب نے بے گھر افراد کو مفت پلاٹ دینے کی سکیم کا بھی جائزہ لیا، اجلاس میں مختلف سفارشات اور تجاویز پر غور کرکے 9 ہزار 15 مکانوں کی تعمیر کیلئے 8 ارب 20 کروڑ روپے کے قرضے جاری کیے گئے۔
اجلاس میں بریفنگ دیتے ہوئے بتایا گیا کہ پنجاب کے 22 اضلاع میں 35 ہاؤسنگ سکیمیں،2 ہزار 807 پلاٹوں کی ڈویلپمنٹ کا کام مکمل ہے، 7اضلاع میں 9 ہاؤسنگ سکیمیں، 1 ہزار 119 پلاٹوں کی ڈویلپمنٹ کا عمل تیز کرنے کا حکم جاری کردیا گیا ہے، 2 ہزار 50 افراد کو مکانات کی تعمیرات کیلئے قرض کی دوسری قسط بھی مل گئی، اپنی چھت اپنا گھر پروگرام کے تحت 4 ہزار 841 گھر زیر تکمیل ہیں، اپنی چھت اپنا گھر پورٹل پر وزٹ کرنے والے شہریوں کی تعداد 7 لاکھ 28 ہزار سے بڑھ گئی ہے، اپنی چھت اپنا گھر پروگرام کیلئے تقریباً 4 لاکھ سے زائد درخواستیں مکمل دستاویزات کے ساتھ آ گئی ہیں، 74 ہزار سے زائد ڈرافٹ درخواستیں بھی اپنی چھت اپنا گھر پورٹل میں جمع ہیں۔